ஒரு பெண் அமெரிக்கா அதிபராவதை காண விரும்பவில்லையா?: கேட்பது ஹிலாரி கிளிண்டன்

வாஷிங்டன்: அமெரிக்காவில் ஒரு பெண் அதிபராவதை நீங்கள் விரும்பவில்லையா? என்று கேள்வி கேட்டு 2016ஆம் ஆண்டு அதிபர் தேர்தலில் போட்டியிட இருப்பதை வெளிப்படுத்தியுள்ளார் அந்நாட்டின் முன்னாள் வெளியுறவுத் துறை அமைச்சர் ஹிலாரி கிளிண்டன்.

அமெரிக்காவின் முன்னாள் அதிபர் பில் கிளிண்டனின் மனைவியும், முன்னாள் வெளியுறவுத் துறை அமைச்சருமான ஹிலாரி கிளிண்டன் ஜனநாயக கட்சியின் முக்கியத் தலைவர்களில் ஒருவராக இருப்பவர். அவர் 2016-ம் ஆண்டு நடைபெற இருக்கும் அமெரிக்க அதிபர் தேர்தலில் போட்டியிடக் கூடும் என எதிர்பார்க்கப்படுகிறது.

இருப்பினும் இது தொடர்பாக நேரடியாக ஹிலாரி கிளிண்டன் கருத்து கூறுவதை தவிர்த்து வந்தார். இந்நிலையில் வாஷிங்டனில் நடைபெற்ற விருது வழங்கும் நிகழ்ச்சி ஒன்றில் ஹிலாரி கிளிண்டன் நேற்று இரவு கலந்து கொண்டார்.

இதில் பேசிய ஹிலாரி கிளிண்டன், பெண் சமத்துவம் பற்றி பேசத் தொடங்கினார்.. பெண்கள் ஒவ்வொரு நிலைகளிலும் பொதுவாழ்க்கையிலும் ஆண்களுக்கு சமமாக இடம்பெற வேண்டும் என்று வலியுறுத்திக் கொண்டே வந்தார்.

ஒரு கட்டத்தில் மிகுந்த உற்சாகத்துடன், நீங்கள் அமெரிக்காவின் அதிபராக ஒரு பெண் வருவதை விரும்பவில்லையா? என்று அரங்கில் இருந்தவர்களைப் பார்த்து கேள்வி எழுப்ப கைதட்டலால் அரங்கமே அதிர்ந்தது.. இந்த கைதட்டல் ஓய சில நிமிடங்களானது.

இந்த ஆதரவுக் குரலால் ஹிலாரியின் முகத்தில் அப்படி ஒரு மகிழ்ச்சி வெளிப்பட்டது. அதே நேரத்தில் வெளியுறவுத் துறை அமைச்சராக ஹிலாரி இருந்த காலத்தில் இ மெயில்களை பயன்படுத்தியது தொடர்பான சர்ச்சை குறித்த கேள்விகளை ஹிலாரி தவிர்த்தும் விட்டார்.

தற்போது அமெரிக்காவின் அதிபராக ஒரு பெண் வர வேண்டும் என்கிற கருத்தை கூறியுள்ளதன் மூலம் அதிபர் தேர்தலில் தாம் போட்டியிட இருப்பதை மறைமுகமாக ஹிலாரி வெளிப்படுத்தியிருக்கிறார்.

English summary

As for her long deferred announcement about the 2016 US presidential race, Clinton did no more than repeat old quips about the difficult question of whether to run for president, at one point asking: “I suppose it’s fair to say: don’t you someday want to see a woman president?”