கலிபோர்னியாவில் பரபரப்பு.. கட்டிடத்தின் மீது மோதிய போர் விமானம்.. பாராசூட்டால் உயிர் தப்பிய பைலட்

லாஸ்ஏஞ்சல்ஸ்: கலிபோர்னியாவில் வழக்கமான பயிற்சிகளில் ஈடுபட்டிருந்த எஃப் 16 ரக போர் விமானம் ஒன்று, வணிக வளாக கிடங்கு ஒன்றில் மோதி விபத்துக்குள்ளானது. எனினும் இந்த விபத்தில் சிக்கிய விமானி பத்திரமாக உயிர் தப்பியுள்ளார்.

இது குறித்து தகவல் தெரிவித்துள்ள விமானப்படை உயரதிகாரிகள் தெற்கு கலிபோர்னியாவில் அமைந்துள்ள மார்ச் ஏர் ரிசர்வ் விமானதளத்திற்கு அருகில் பயிற்சிக்காக சென்ற எஃப் 16 ரக ஜெட் விபத்தில் சிக்கியதாக கூறியுள்ளனர்.

விபத்திற்குள்ளான அந்த குறிப்பிட்ட ஜெட் விமானமானது சவுத் டகோடாவின், ஸூக்ஸ் ஃபால்ஸ் நகரத்தில் உள்ள114 வது ஃபைட்டர் விங் பிரிவை சேர்ந்தது. இந்த ஜெட் விமானத்தை கொண்டு விமானி ஒருவர் வழக்கமான பயிற்சியில் ஈடுபட்டுள்ளார்.

அப்போது எதிர்பாராதவிதமாக வணிக வளாக கிடங்கு ஒன்றின் மீது பயங்கரமாக எஃப் 16 போர் விமானம் மோதி நொறுங்கியுள்ளது. எனினும் ஜெட்டை இயக்கிய விமானி தக்க சமயத்தில், பாராசூட் உதவியுடன் கீழே குதித்து உயிர் தப்பினார். பாராசூட்டிலிருந்து குதிக்கும் போது விமானிக்கு காயங்கள் ஏற்பட்டுள்ளது.

ஜெட் விமானம் கிடங்கின் மீது பயங்கரமாக மோதியதில், அக்கட்டிடத்தின் மேற்பகுதியில் மிகப்பெரிய ஓட்டை விழுந்துள்ளது. விமானம் மோதியதையடுத்து அந்த கட்டிடத்தில் தீ விபத்தும் ஏற்பட்டது.

இதனையடுத்து தீயணைப்பு துறையினருக்கு விரைந்து தகவல் அளிக்கப்பட்டது. பின்னர் 6 தீயணைப்பு வண்டிகளில் வந்த வீரர்கள் கட்டிடத்தில் பற்றிய தீயை கட்டுக்குள் கொண்டு வந்தனர். இந்த விபத்தின் போது பாதிக்கப்பட்ட கட்டிடத்தினுள் யாரும் இல்லை என்பது ஆறுதலான விஷயமாகும்.

ஆனால் இதனை உயிர்பிழைத்த விமானியால் நம்ப இயலவில்லை என அதிகாரிகள் கூறியுள்ளனர். மேலும் காயமடைந்த விமானிக்கு மருத்துவமனையில் சிகிச்சை அளிக்கப்பட்டு வருவதாகவும் தெரிவிக்கப்பட்டுள்ளது.

இந்த விபத்தால் மக்களுக்கோ, அவர்களது உடமைகளுக்கோ பெரிய அளவில் சேதமில்லை என்றே அதிகாரிகள் கூறுகின்றனர். மேலும் விபத்திற்கான காரணம் குறித்தும் தீவிரமாக விசாரித்து வருகின்றனர்.

English summary

A F-16 aircraft fighter, involved in routine training in California, collided with a commercial warehouse. However, the pilot survived the accident.