”ஸ்பெர்ம் டொனேட்” செய்தால் உடனே ஐபோன் 6s பரிசு - தனியார் மருத்துவமனை அசத்தல்!
பீஜிங்: சீனாவில் விந்தணு தானம் செய்யும் ஆண்களுக்கு ஐபோன் 6s செல்போனை பரிசாக அளிப்பதாக தனியார் மருத்துவமனை ஒன்று அறிவித்துள்ளது.
சமீபத்தில் வெளியாகி உலகம் முழுவதும் விற்பனையில் பட்டையை கிளப்பிக் கொண்டிருக்கும் ஆப்பிள் ஐபோன் 6S ரக கைபேசியை எப்படியாவது வாங்கியே தீர வேண்டும் என பலர் கனவு கண்டுவரும் நிலையில் விந்து தானம் அளிப்பவர்களுக்கு இந்த கைபேசியை பரிசாக அளிப்பதாக சீனாவில் உள்ள பிரபல தனியார் மருத்துவமனை அறிவித்துள்ளது.
இதில் சிறப்பம்சம் என்னவென்றால், குறைந்தபட்சம் 48 நாட்கள் இடைவெளியில் தொடர்ந்து ஆறு மாதம் வரை ஒருவர் எத்தனை முறை வேண்டுமானாலும் விந்து தானம் அளிக்கலாம். ஒவ்வொரு முறையும் ஒரு 6S ரக ஐபோன் பரிசாக வழங்கப்படும். அல்லது அந்த கைபேசியின் உள்நாட்டு விலையாக 6 ஆயிரம் யுவான் அதாவது இந்திய மதிப்புக்கு சுமார் 60 ஆயிரம் ரூபாய் அளிக்கப்படும் என அறிவிக்கப்பட்டுள்ளது.
ஆனால், தானம் அளிப்பவர் குறைந்தபட்சம் 165 சென்டிமீட்டர் அதாவது ஐந்தரை அடி உயரம் இருக்க வேண்டும். குறைந்தபட்சமாக ஒரு கல்லூரி பட்டம் பெற்றவராக இருக்க வேண்டும் என இப்படி அறிவித்துள்ள மருத்துவமனைகளில் ஒன்றான ஷங்காய் ருஜின் ஆஸ்பத்திரி நிர்வாகம் நிபந்தனை விதித்துள்ளது.