விஸ்கி விலை குறைய போகுது! இங்கிலாந்துடன் எளிமையாகும் வணிகம்! வேறென்ன எல்லாம் விலை குறையும்? பாருங்க

லண்டன்: இந்தியா-இங்கிலாந்து இடையே தடையற்ற வர்த்தகம் தொடர்பான ஒப்பந்தம் நாளை கையெழுத்தாக இருக்கிறது. எனவே இதன் மூலம் அங்கிருந்து வரும் விஸ்கி உள்ளிட்ட பொருட்களின் விலை குறையும். அதேபோல இந்தியாவிலிருந்து ஏற்றுமதியாகும் பொருட்களுக்கு வரி குறையும்.

பிரிட்டன், மாலத்தீவு உள்ளிட்ட நாடுகளுக்கு 4 நாட்கள் பயணத்தை பிரதமர் நரேந்திர மோடி மேற்கொள்கிறார். இன்று அவரது பயணம் தொடங்கியுள்ளது. நாளை பிரிட்டனில் முக்கிய வர்த்தக ஒப்பந்தம் அவர் முன்னிலையில் கையெழுத்தாகிறது.

இந்த ஒப்பந்தத்தின் மூலம் இரு நாடுகளுக்கு இடையேயான வர்த்தகம் 2030 ஆம் ஆண்டுக்குள் 120 பில்லியன் டாலர்களாக அதிகரிக்கும் என்று எதிா்பாா்க்கப்படுகிறது. இந்த ஒப்பந்தத்தின் முக்கிய அம்சங்கள் பின்வருமாறு.

இந்த ஒப்பந்தத்தின் மூலம் பிரிட்டனில் இருந்து வரும் 90 சதவீத பொருட்களுக்கு இந்தியா வரி விலக்கு அளிக்கும். இதன்படி, விஸ்கி மற்றும் ஜின் மீதான வரி 150 சதவீதத்தில் இருந்து 75 சதவீதமாக குறைக்கப்படும். பின்னர் படிப்படியாக குறைக்கப்பட்டு 10 ஆண்டுகளில் 40 சதவீதமாக இருக்கும். கார்களுக்கான வரி 100 சதவீதத்தில் இருந்து 10 சதவீதமாக குறைய வாய்ப்புள்ளது. மேலும் அழகு சாதனப் பொருள்கள், மருத்துவ உபகரணங்கள், சால்மன் மீன், சாக்லேட் மற்றும் பிஸ்கட் போன்ற பொருட்களின் மீதான வாியும் குறையும்.

எதெல்லாம் விலை குறையும் என்பது குறித்து இந்திய வர்த்தக அமைச்சகம் சில தகவல்களை வழங்கியுள்ளது. அதன்படி, இந்தியப் பொருட்களுக்கு 99 சதவீதம் வரி இல்லாத அணுகலை இங்கிலாந்து நமக்கு கொடுக்கும். இந்த ஒப்பந்தம் இந்தியாவிற்கும் இங்கிலாந்துக்கும் எவ்வாறு பயனளிக்கும் என்றால், தற்போது 4 சதவீதம் முதல் 16 சதவீதம் வரை உள்ள ஜவுளி, காலணி, ஆபரணங்கள், மரச்சாமான்கள், ஆட்டோ உதிரி பாகங்கள், ரசாயனங்கள், இயந்திரங்கள் மற்றும் விளையாட்டுப் பொருட்கள் போன்ற இந்திய ஏற்றுமதிகளுக்கு இங்கிலாந்தில் வரி இருக்காது.

இந்திய வர்த்தக அமைச்சகத்தின் தகவல்படி, வணிகத்திற்காக வருபவர்கள், ஒப்பந்த சேவை வழங்குநர்கள், யோகா பயிற்றுவிப்பாளர்கள், சமையல்காரர்கள் மற்றும் இசைக்கலைஞா்கள் ஆகியோருக்கு இங்கிலாந்தில் தற்காலிகமாகத் தங்குவதற்கு அனுமதி வழங்கப்படும். இந்த ஒப்பந்தத்தின் மூலம் பிரிட்டன் நிறுவனங்களுக்கு இந்திய பொது கொள்முதல் சந்தையில் ஒரு வாய்ப்பு கிடைக்கும் என்று சொல்லப்பட்டிருக்கிறது.

English summary

The India-UK Free Trade Deal will make UK whisky significantly cheaper in India, along with reduced prices for British cars, cosmetics and medical devices. Key benefits of the new trade agreement for Indian consumers.