பேருதான் டிராகன்! கருவை போல் சுமந்து வந்த விண்கலம்! கேப்சூலை திறந்ததும் சுபான்ஷு சுக்லா செய்தது என்ன

வாஷிங்டன்: சர்வதேச விண்வெளி நிலையத்தில் தங்கி ஆய்வுகளை மேற்கொண்ட இந்திய வீரர் சுபான்ஷு சுக்லா உள்ளிட்ட 4 பேர் டிராகன் விண்கலம் மூலம் பத்திரமாக பூமிக்கு வந்து சேர்ந்தனர். அந்த விண்கலத்தில் இருந்து சுக்லா வெளியே வந்த போது முகத்தில் புன்னகையுடன், அங்கிருந்தோரை பார்த்து கையசைத்தபடியே வெளியே வந்தார்.

சுபான்ஷு சுக்லா உள்ளிட்ட 4 விண்வெளி வீரர்களும் நேற்று மாலை 4.35 மணிக்கு சர்வதேச விண்வெளி நிலையத்திலிருந்து டிராகன் விண்கலத்தில் பூமிக்கு புறப்பட்டனர். அவர்கள் அதீத வெப்பத்தை கடந்து வர வேண்டியிருந்ததால் அவர்களின் உடலை வெப்பம் தாக்காத வகையிலான பிரத்யேக உடையை அணிந்திருந்தனர்.

சுமார் 23 மணி நேர பயண நேரத்திற்கு ஸ்பாஷ் டவுன் முறையில் இந்திய நேரப்படி மாலை 3.15 மணிக்கு வந்தனர். அமெரிக்காவின் கலிபோர்னியா மாகாணம் பசிபிக் கடலில் விண்கலம் இறங்கியது. சுமார் 5.5 கி.மீ. உயரத்தில் பாராசூட்கள் விரிக்கப்பட்டு விண்கலம் கடலில் இறங்கியது.

அப்போது அங்கு தயாராக இருந்த கடற்படை வீரர்கள், அந்த கேப்சூலை கப்பலுடன் இணைத்தனர். பின்னர் அந்த விண்கலம் பல்வேறு நிலைகளில் பயணம் செய்து வந்தமையால் கதவை திறக்கும் போது வீரர்களுக்கு நோய்த் தொற்று ஏற்படாத வண்ணம் தண்ணீர் பீய்ச்சி கழுவப்பட்டது.

சூரியனின் அதீத வெப்பத்தால் அந்த கேப்சூலின் வெளிப்புறம் உருகி நிறமே மாறியிருந்தது. இதையடுத்து அந்த கேப்சூலின் வெளிப்புற கதவை நாசா விஞ்ஞானிகள் திறந்தனர். பின்னர் உள்புற கதவை வீரர்கள் திறந்தனர். அப்போது உள்ளே சிரித்த முகத்துடன் நலமாக இருந்த வீரர்களை அங்கிருந்த புகைப்பட கலைஞர்கள் புகைப்படம் எடுத்துக் கொண்டனர்.

பின்னர் அவர்களில் முதலில் அமெரிக்​கா​வின் பெக்கி விட்​சன் என்ற வீராங்கனை வெளியே வந்தார். இதைத் தொடர்ந்து இந்திய வீரர் சுக்லா வெளியே வந்தார். அப்போது அவர் சிரித்த முகத்துடன் கைகளை அசைத்தபடியே வெளியே வந்தார். அவரை நாசா விஞ்ஞானிகள் கைத்தாங்கலாக பிடித்து அழைத்துச் சென்றனர்.

அந்த கேப்சூல் கர்ப்பப்பையை போல் இந்த 4 பேரையும் தாங்கிக் கொண்டு வந்தது. அவர்கள் வெளியே வந்த தருணம் கிட்டதட்ட பிரசவம் போல் மறுபிறவி மாதிரி இருந்தது. சுக்லா பயணித்த விண்கலம் பூமியின் வளிமண்டல பகுதியில் வந்துவிட்டால் ஆபத்து ஏதும் இல்லை என்று அர்த்தம். எனினும் ஸ்பாஷ் டவுன் ஆகும் போது எந்த ஆபத்தும் இல்லாமல் அந்த விண்கலத்தை கடற்படை வீரர்கள் மீட்பது முக்கியமானது. இவை அனைத்தும் சுக்லா விவகாரத்தில் நல்லபடியாக நடந்து முடிந்தது.

சுக்லா உள்ளிட்ட 4 பேரும் வந்ததும் அவர்களது ரத்த அழுத்தம், நாடி துடிப்பெல்லாம் சோதனை செய்யப்பட்டது. இந்த நிலையில் அடுத்த 7 நாட்களுக்கு அவர்கள் 4 பேரும் தனிமைப்படுத்தப்படுவர். பின்னர் அவர்களுக்கு மனரீதியிலான கவுன்சலிங் கொடுக்கப்படும்.

முன்னதாக அமெரிக்​கா​வின் அக்​ஸி​யம் ஸ்பேஸ், நாசா, இஸ்​ரோ, ஐரோப்​பிய விண்​வெளி முகமை ஆகியவை இணைந்து கடந்த 25-ம் தேதி சர்​வ​தேச விண்​வெளி நிலை​யத்​துக்கு பால்​கன் ராக்கெட் மூலம் டிராகன் விண்​கலத்தை அனுப்​பின. இந்த விண்​கலத்​தில் இந்​திய வீரர் ஷுபன்ஷு சுக்​லா, அமெரிக்​கா​வின் பெக்கி விட்​சன், போலந்​தின் ஸ்லா​வோகி உஸ்​னான்​ஸ்​கி, ஹங்​கேரி​யின் திபோர் கபு ஆகியோர் 28 மணி நேரம் பயணம் செய்து கடந்த 26-ம் தேதி சர்​வ​தேச விண்​வெளி நிலை​யத்தை சென்​றடைந்​தனர்.

கடந்த 28-ம் தேதி பிரதமர் நரேந்​திர மோடி​யுடன் சுக்லா உரை​யாடி​னார். சுக்லா உள்ளிட்டோர் 17 நாட்கள் அங்கு தங்கியிருந்தனர். பின்னர் நெல், காராமணி, எள், கத்தரி, தக்காளி உள்ளிட்ட 6 வகையான விதைகளை சுக்லா விண்வெளிக்கு எடுத்துச் சென்றார். அங்கு அவர் சிறப்பு பெட்டிகளில் வைத்து முளைக்கச் செய்தார்.

பாசி பன்​றிக்​குட்டி என்ற நுண் உயி​ரியை ஷுபன்ஷு சுக்லா விண்​வெளிக்கு எடுத்​துச் சென்​றார். இதை வெறும் கண்​ணால் பார்க்க முடி​யாது. நுண்​நோக்கி உதவி​யுடன் மட்​டுமே பார்க்க முடி​யும். இந்த நுண் உயிரி விண்​வெளி​யில் எவ்​வாறு வளர்​கிறது என்​பது குறித்​தும் சுக்லா ஆய்வு செய்​தார்.நீல பச்சை பாசி வகையை சேர்ந்த இரு பாசிகளை அவர் விண்​வெளிக்கு எடுத்​துச் சென்​றார். இந்த பாசி வகைகள் எவ்​வாறு வளர்​கின்றன என்​பது குறித்து அவர் ஆய்வு நடத்​தி​னார். மைக்​ரோஅல்கா என்ற பாசி வகை​யை​யும் சுக்லா விண்​வெளிக்கு எடுத்​துச் சென்​றார். ஒட்டுமொத்தமாக 60 வகையான ஆய்வுகளை செய்தார்.

சர்வதேச விண்வெளி ஆய்வு மையத்தில் ஆய்வு செய்த முதல் இந்தியர் என்ற பெருமையை சுக்லா பெறுகிறார். ராகேஷ் சர்மாவுக்கு அடுத்து விண்வெளி பயணம் மேற்கொண்ட இரண்டாவது இந்தியர் என்ற பெருமையையும் சுக்லா பெற்றார்.