ஜஸ்ட் 4 நிமிடம்தான்.. எல்லாம் போச்சு.. மாயமான இந்தோனேஷியா விமானம் பற்றி பரபரப்பு தகவல்

ஜகார்த்தா: ஜகார்த்தா விமான நிலையத்தில் இருந்து கிளம்பிய இந்தோனேஷியாவை சேர்ந்த ஸ்ரீ விஜயா விமானம் 4 நிமிடத்துக்குள் கட்டுப்பாட்டு அறையுடனான தொடர்பை இழந்து விட்டது என்று அதிகாரிகள் தெரிவிக்கிறார்கள்.

இந்திய நேரப்படி இன்று பிற்பகல் 12.40 மணியளவில் இந்த விமானம் விமான நிலையத்திலிருந்து கிளம்பியுள்ளது. அடுத்த 4 நிமிடத்துக்குள் விமானம் கட்டுப்பாட்டு அறையுடனான தொடர்பை இழந்து விட்டது. அதற்குள்ளாக அந்த விமானம் 10 ஆயிரம் அடி உயரத்தை தொட்டு விட்டதாக கூறப்படுகிறது.

10 ஆயிரத்து 900 அடி உயரம் வரை அது பறக்கும்போது கட்டுப்பாட்டு அறையுடன் தொடர்பு இருந்துள்ளது. அதன் பிறகுதான் என்ன ஆனது என்று தெரியவில்லை. 1994ஆம் ஆண்டு முதல் இந்த விமானம் இயக்கப்படுகிறது. 26 வருடம் பழமையான விமானம் இதுவாகும்.

பயணிகள்

விமானத்தில் அதிகபட்சமாக 120 பேர் பயணிக்கக்கூடிய இருக்கை வசதி இருந்தபோதிலும் எத்தனை பயணிகள் இருந்தார்கள் எத்தனை ஊழியர்கள் இருந்தார்கள் என்பது பற்றிய உறுதியான தகவல்கள் இன்னும் வெளியாகவில்லை. சுமார் 50 பயணிகள் இருந்ததாக சில ஏஜென்சி செய்திகள் தெரிவிக்கின்றன.

ஜகார்த்தா கடற்கரை

இதனிடையே, விமானம் அந்த நாட்டு தலைநகர் ஜகார்த்தா கடற்கரையில் உடைபட்ட நிலையில் கிடப்பதாக பொதுமக்கள் சிலர் தகவல் கொடுத்துள்ளனர். அது விமான பாகங்கள்தானா என்பதை உறுதி செய்யும் பணிகளை அதிகாரிகள் துவங்கியுள்ளனர்.

போயிங் விமானம்

2018ஆம் ஆண்டு அக்டோபர் மாதம் லயன் போயிங் 737 மேக்ஸ் ஜெட் விமானம் ஜாவா கடலில் விழுந்து விபத்துக்குள்ளானது. ஜகார்த்தா விமான நிலையத்திலிருந்து கிளம்பிய 12 நிமிடங்களுக்குள் இந்த விபத்து நடைபெற்றது. இந்த விபத்தில் 190 பயணிகள் கொல்லப்பட்டனர்.

விபத்துகள்

போயிங் 737 வகை விமானங்கள் அடிக்கடி விபத்துக்குள்ளாகுவதை வழக்கமாகக் கொண்டிருக்கின்றன. எனவே பல நாடுகளிலும் இந்த வகை விமானங்கள் இயக்கப்படுவது தவிர்க்கப்படுவது குறிப்பிடத்தக்கது.

English summary

Indonesian Boeing 737 plane lost within 1 minute at 10000 feet says reports.