ஈரானில் பெண்கள் வாலிபால் போட்டிகளைப் பார்க்க தடை!

By Mayura Akilan

Published: Monday, June 23, 2014, 12:41 [IST]

Subscribe to Oneindia Tamil

டெஹ்ரான்: வாலிபால் போட்டியை கண்டு ரசிக்க பெண் ரசிகைகள், பெண் பத்திரிகையாளர்களுக்கு ஈரான் நாட்டு அரசு தடை விதித்துள்ளது.

ஈரான்- இத்தாலி இடையே உலக வாலிபால் போட்டிக்கான லீக் போட்டிகள் இன்று டெக்ரானில் நடைபெறுகின்றன.

கடந்த வெள்ளிக்கிழமையன்று அங்குள்ள ஆசாதி ஸ்டேடியத்தில் ஈரான்- இத்தாலி இடையே நடைபெற்ற வாலிபால் போட்டியைக் காணச்சென்ற பெண் பத்திரிகையாளர்கள் உடனடியாக வெளியேற்றப்பட்டனர்.

வாலிபால் ஆணையம் தடை

அடுத்த மூன்று போட்டிகளைக் காண பெண் ஊடகவியலாளர்களுக்கும், பெண் ரசிகைகளும் அனுமதியில்லை என்று ஈரான் வாலிபால் விளையாட்டு ஆணையம் சார்பில் அதிகாரப்பூர்வமாக அறிவிக்கப்பட்டது.

பெண்கள் போராட்டம்

இதனையடுத்து ஸ்டேடியத்தின் வாசல்முன்பு ஏராளமான பெண்கள் போராட்டத்தில் ஈடுபட்டனர்.

கைது செய்து விடுதலை

சகாரா டெய்லி நாளிதழின் ரிப்போர்ட்டர் பாதேமா ஜமல்பூரும் இந்த ஆர்பாட்டத்தில் பங்கேற்றார். அவரை கைது செய்த போலீசார் ஆறுமணிநேரம் சிறை வைத்து பின்னர் விடுவித்தனர்.

ஃபேஸ்புக்கில் கொதிப்பு

இதனை தனது ஃபேஸ்புக் பக்கத்தில் அவர் பதிவு செய்துள்ளார்.கடந்த 2013ம் ஆண்டு நடைபெற்ற வாலிபால் போட்டியைக் காண பெண்களும், ஊடகவியாலாளர்களும் அனுமதிக்கப்பட்டனர்.

இம்முறை மட்டும் தடை ஏன்…

ஆனால் இம்முறை எந்தவித விளக்கமும் அளிக்காமல் வாலிபால் போட்டியைக் காண தடை விதிக்கப்பட்டுள்ளது என்றும் அவர் புகார் தெரிவித்துள்ளார். இதனை புகராகவும் ஈரான் அதிபருக்கு அனுப்பியுள்ளார்.

எழுதலாம்.. பார்க்கக் கூடாதா…

ஈரான் நாட்டில் சமூக வலைத்தளங்களில் எழுதும் அளவிற்கு பெண்களுக்கு சுதந்திரம் உள்ளது. ஆனால் போட்டியைக் காண தடை விதிக்கப்பட்டுள்ளதால் அவர்கள் எப்படி ஊடகங்களில் பதிவு செய்ய முடியும் என்றும் கேள்வி எழுப்பியுள்ளார்.