2000 மீட்டர் ஆழத்தில் உடல்கள்! ஈரான் அதிபர் இப்ராஹிம் ரைசியின் உடலை அடையாளம் காண்பதில் சிக்கல்

தெஹ்ரான்: ஈரான் அதிபர் இப்ராஹிம் ரைசியின் உடல் கண்டெடுக்கப்பட்ட நிலையிலும் யார் யார் உடல் என்பதில் அடையாளம் காண்பதில் சிக்கல் ஏற்பட்டுள்ளதாக தகவல்கள் வெளியாகியுள்ளது.

ஈரான் நாட்டு அதிபர் இப்ராஹிம் ரைசி. இவருக்கு வயது 63 ஆகிறது. இவர் கிழக்கு அஜர்பைஜானில் நடந்த ஒரு விழாவில் கலந்து கொண்டார். இதையடுத்து ஞாயிற்றுக்கிழமை அவர் மீண்டும் திரும்புகையில் மோசமான வானிலையால் அவர் பயணித்த ஹெலிகாப்டர் விபத்துக்குள்ளானது.

இதையடுத்து தகவலறிந்த மீட்பு படையினர் துரிதமாக மீட்பு பணிகளில் ஈடுபட்டனர். ஆனால் ரைசி பயணித்த ஹெலிகாப்டர் குறித்த தகவல் ஏதும் கிடைக்கவில்லை. இந்த நிலையில் சுமார் 17 மணி நேரம் கழித்து அதிபர் ரைசி பயணித்த விமானத்தின் பாகங்கள் கண்டெடுக்கப்பட்டது. இந்த விமானம் முற்றிலும் சிதிலமடைந்துவிட்டதால் அதில் யாரும் உயிருடன் இருக்க வாய்ப்பில்லை என அந்நாட்டு அரசு தெரிவித்திருந்தது.

இதையடுத்து இந்த விபத்தில் ஈரான் அதிபர் இப்ராஹிம் ரைசி உள்பட 8 பேர் உயிரிழந்ததாக அந்த நாட்டு அரசு ஊடகங்கள் தகவல் தெரிவித்துள்ளன. இதையடுத்து ரைசியின் மரணத்திற்கு பல்வேறு நாட்டு அதிபர்கள், பிரதமர்கள், உள்ளிட்டோர் இரங்கலை தெரிவித்து வருகிறார்கள்.

இந்த நிலையில் ரைசி உள்பட 8 பேரின் உடல்களை தேடும் பணிகளை ஈரான், ரஷ்யா, துருக்கி உள்பட பல வெளிநாட்டு மீட்பு பணியினரும் ஈடுபட்டு வந்தனர். பெல் 212 ஹெலிகாப்டர் விழுந்த இடம் அடையாளம் காணப்பட்டுள்ளது. அதில் மொத்தம் 9 பேர் பயணித்ததாக முதல் கட்ட தகவல்கள் தெரிவிக்கின்றன.

ஈரான் அதிபருடன் ஈரான் வெளியுறவுத் துறை அமைச்சர், கிழக்கு அஜர்பைஜானின் தலைவர் உள்ளிட்டோர் பயணித்தனர். ஹெலிகாப்டர் விழுந்த இடத்தில் உடல்கள் கண்டெடுக்கப்பட்டுள்ளன. ஆனால் அந்த உடல்களில் எது ரைசியின் உடல் என்பதை அடையாளம் காண்பதில் சிக்கல் இருக்கிறது.

உடல்களை மீட்பு படையினர் 2000 மீட்டர் உயரம் உள்ள செங்குத்து மலை பாதையில் இருந்து கடினமான சூழலில் கொண்டு வருகிறார்கள். அவர்களுடைய உடல் சம்பவம் நடந்த இடத்தில் இருந்து 100 கி.மீ. தூரத்தில் உள்ள தஜ்ரிஷ் நகரை நோக்கி கொண்டு வரும் பணிகள் நடைபெறுகிறது. அங்கிருந்து 600 கி.மீ. தொலைவில் உள்ள தெஹ்ரானுக்கு கொண்டு வரப்படும்.

ஈரான் அதிபர் ரைசிக்கு இறுதி சடங்குகளை நடத்தவும் ஈரான் அரசு ஏற்பாடுகளை செய்து வருகிறது. முதலில் தஜ்ரிஷ் நகரில் உள்ள மருத்துவமனைக்கு உடல்கள் கொண்டு செல்லப்பட்டு அங்கு அதிபரின் உடல் அடையாளம் காணப்பட்டு பிறகு இறுதி சடங்கு நடைபெறும் இடத்திற்கு கொண்டு செல்லப்படும். விமான விபத்துகளில் இறந்தவர்களின் உடல்களை அவர்களுடைய அங்க அடையாளம், உடை உள்ளிட்டவற்றை கொண்டு அடையாளம் காணும் பணிகள் நடைபெறும். அதில் முடியாவிட்டால் டிஎன்ஏ பரிசோதனை செய்யப்பட்டு அடையாளம் காணப்படும்.

இதையடுத்து ஈரான் அதிபரின் உடல் பொதுமக்கள் அஞ்சலிக்காக 2, 3 நாட்கள் வைக்கப்படும் என தெரிகிறது. ஈரான் நாட்டு அதிபர் பயணித்த ஹெலிகாப்டர் அமெரிக்காவின் பெல் 212 ரக ஹெலிகாப்டராகும். இது 5 டன் எடையை தாங்கும் திறன் கொண்டது. 14 ஆயிரம் அடி உயரத்தில் பறக்கும் திறன் உள்ளது.

English summary

Iran president Ebrahim Raisi's dead body was rescued, but there is difficulty to identify.