ஓமனில் டிவி விழுந்து 18 மாத இந்திய ஆண் குழந்தை பலி

துபாய்: ஓமனில் டிவி பெட்டி மேலே விழுந்ததில் 18 மாத குழந்தை ஆதி பரிதாபமாக உயிர் இழந்தது.

கேரளாவைச் சேர்ந்த தம்பதி ஓமனில் உள்ள அல் குவைர் பகுதியில் வசித்து வருகின்றனர். அவர்களின் 18 மாத ஆண் குழந்தை ஆதி. கடந்த வெள்ளிக்கிழமை அன்று ஆதி டிவி வயர்களுடன் விளையாடிக் கொண்டிருந்திருக்கிறது. அப்போது டிவி குழந்தை மீது விழுந்துள்ளது.

இதில் படுகாயம் அடைந்த குழந்தை தனியார் மருத்துவமனையில் அனுமதிக்கப்பட்டது. டிவி விழுந்ததில் குழந்தையின் உள்ளுறுப்புகள் சேதமடைந்து உள்ளூர ரத்தப்போக்கு ஏற்பட்டது. இதையடுத்து குழந்தை சிகிச்சை பலனின்றி கடந்த வெள்ளிக்கிழமையே பலியானது.

இதையடுத்து குழந்தையின் உடல் நேற்று முன்தினம் இந்தியாவுக்கு கொண்டு வரப்பட்டது. டிவி விழுந்தபோது அந்த அறையில் குழந்தை தனியாக இருந்தது என்று அதன் பெற்றோரின் நண்பர்கள் தெரிவித்தனர்.

English summary

A 18-month-old Indian toddler has died in a freak accident in Oman after a television set fell on him, a media report said. Aadhi, whose parents are from Kerala, was playing with the connecting wires when it crashed on him. He died on Friday due to intense bleeding.