ஒரு பக்கம் ஜூனோ, மறுபக்கம் கலிபோர்னியாவில் நிலநடுக்கம்: வாடும் அமெரிக்கா

கலிபோர்னியா: அமெரிக்காவில் உள்ள வடக்கு கலிபோர்னியா கடற்கரை பகுதி அருகே நிலநடுக்கம் ஏற்பட்டது. இது ரிக்டர் அளவுகோலில் 5.7 ஆக பதிவாகி இருந்தது.

அமெரிக்காவின் வட கிழக்குப் பகுதிகளை ஜூனோ பனிப்புயல் வதைத்து வருகிறது. இந்நிலையில் வடக்கு கலிபோர்னியா கடற்கரை பகுதி அருகே புதன்கிழமை நிலநடுக்கம் ஏற்பட்டது. இது ரிக்டர் அளவுகோலில் 5.7 ஆக பதிவாகி இருந்தது.

இது குறித்து அமெரிக்க புவியியல் ஆய்வு மையம் வெளியிட்டுள்ள அறிக்கையில் கூறியிருப்பதாவது,

யுரேகாவின் தென்மேற்கில் இருந்து 40 கி.மீ தொலைவில் கடலுக்கடியில் இந்த நிலநடுக்கம் மையம் கொண்டிருந்தது. 17.2 கி.மீ சுற்றளவிற்கு நிலநடுக்கத்தால் அதிர்வு ஏற்பட்டது. தொடக்கத்தில் 5.1 என்ற ரிக்டர் அளவிற்கு வலிமை குறைந்த அளவில் ஏற்பட்ட நிலநடுக்கம், பின்னர் ரிக்டர் அளவுகோலில் 5.7 ஆக பதிவானது என்று அதில் தெரிவிக்கப்பட்டுள்ளது.

இந்த நிலநடுக்கத்தால் யுரேகா, ஆர்காட்டா, பெர்ன்டேல், பார்ச்சூனா ஆகிய இடங்களில் அதிர்வு ஏற்பட்டது. இதனால் மக்கள் பீதி அடைந்தனர். மேலும் சான் ஜோஸ் மற்றும் சாலினாஸ் ஆகிய தொலைதூர பகுதியிலும் அதிர்வு உணரப்பட்டுள்ளது.

நிலநடுக்கத்தால் எந்தவித சேதமும் ஏற்பட்டதாக தகவல் இல்லை. மேலும் சுனாமி எச்சரிக்கை எதுவும் விடுக்கப்படவில்லை.

English summary

Quake measuring 5.7 in the richter scale struck off the coast of northern California on wednesday.