ஓவர் ஆபாசம்.. ஜெனிபர் லோபஸின் ஹஸ்ட்லர்ஸ் படத்துக்கு மலேசியாவில் தடை!

மலேசியாவில் ஜெனிபர் லோபஸின் ஹஸ்ட்லர்ஸ் படத்துக்கு தடை விதிக்கப்பட்டுள்ளது.

கோலாலம்பூர்: பிரபல நடிகை ஜெனிபர் லோபஸ் நடித்த ஹஸ்ட்லர்ஸ் படத்தை திரையிட மலேசிய அரசு தடை விதித்துள்ளது.

அமெரிக்காவைச் சேர்ந்த பிரபல நடிகை ஜெனிபர் லோபஸ். சுருக்கமாக ரசிகர்கள் இவரை ஜே.லோ என்று குறிப்பிடுவர். ஹாலிவுட் நடிகை என்பதோடு, பாடகி, டான்ஸர், ஃபேஷன் டிசைனர் மற்றும் டிவி நிகழ்ச்சி தயாரிப்பாளர் என பன்முகத்திறமையாளர் இவர்.

தன்னுடைய அழகாலும் திறமையாலும் ஏராளமான ரசிகர்களை கவர்ந்தவரான ஜெனிபர் லோபஸுக்கு உலகம் முழுவதும் ரசிகர்கள் உள்ளனர்.

இந்நிலையில், ஜெனிபர் லோபஸ் தற்போது ஹஸ்ட்லர்ஸ் என்ற படத்தில் நடித்துள்ளார். இப்படத்தில் ஜெனிபருடன் ஜூலியா ஸ்டில்ஸ், கெகே பால்மர், கான்ஸ்டன்ஸ் வூ ஆகியோரும் நடித்துள்ளனர். 2015-ம் ஆண்டு பத்திரிகையில் வெளியான கட்டுரை ஒன்றை அடிப்படையாகக் கொண்டு இப்படம் எடுக்கப்பட்டுள்ளது.

இம்மாதம் 9ம் தேதி இப்படம் உலகம் முழுவதும் ரிலீசானது. இப்படத்தில் ஆபாசக் காட்சிகள் அதிகம் உள்ளன. எனவே, இதனை மலேசியாவில் வெளியிட அந்நாட்டு அரசு தடை விதித்துள்ளது.

இது தொடர்பாக அந்நாட்டின் தணிக்கை குழு வெளியிட்டுள்ள அறிக்கையில், "ஹஸ்ட்லர்ஸ் படத்தில் அரை நிர்வாண காட்சிகள், பாலுணர்வைத்தூண்டும் நடனங்கள், போதைப்பொருள் காட்சிகள் போன்றவை இடம் பெற்றுள்ளன. எனவே, இப்படம் இங்குள்ள மக்களுக்கு திரையிட ஏற்றது அல்ல" எனத் தெரிவிக்கப்பட்டுள்ளது.

மலேசியாவில் தடை விதிக்கப்பட்டபோதும், அமெரிக்காவிலும், இங்கிலாந்திலும் ஹஸ்ட்லர்ஸ் படம் வசூலை வாரி குவித்து வருகிறது.

முன்னதாக இதே போல், தமிழ்ப் படமான கடாரம் கொண்டானுக்கும் மலேசியாவில் தடை விதிக்கப்பட்டிருந்தது. விக்ரம் நடித்திருந்த அப்படத்தில் மலேசிய போலீஸ் குறித்து தவறாக சித்தரிக்கப் பட்டிருந்ததாக கூறி தடை விதிக்கப்பட்டது குறிப்பிடத்தக்கது.

English summary

Malaysia has banned the movie