யு.எஸ்.: துப்பாக்கியை சுத்தம் செய்கையில் குண்டு வெடித்து 7 மாத குழந்தை பலி: வாலிபர் கைது

நியூயார்க்: அமெரிக்காவில் 18 வயது வாலிபர் ஒருவர் தனது துப்பாக்கியை சுத்தம் செய்கையில் குண்டு வெடித்ததில் அவரின் காதலியின் 7 மாத ஆண் குழந்தை பலியாகியுள்ளது.

அமெரிக்காவின் நியூயார்க் மாநிலத்தில் உள்ள ரோம் நகரில் வசித்து வருபவர் ஹென்றி பார்டில்(18). அவரது காதலி செலினா ஹிட்(19). செலினாவின் மகன் 7 மாத குழந்தையான நதானியல் ஹிட். செலினா கடந்த ஜூன் மாதம் தான் ஹென்றியின் வீட்டில் குடியேறி அவருடன் லிவ் இன் முறைப்படி வசித்து வருகிறார்.

இந்நிலையில் ஹென்றி கடந்த சனிக்கிழமை வீட்டில் தனது துப்பாக்கியை சுத்தம் செய்துள்ளார். அப்போது தவறுதலாக குண்டு வெடித்து நதானியல் பலியானார். சம்பவம் நடந்தபோது வீட்டில் செலினா மற்றும் குடும்ப நண்பர் ஒருவரும் இருந்துள்ளனர். இந்த சம்பவம் பற்றி போலீசார் வழக்குப்பதிவு செய்து ஹென்றியை கைது செய்து விசாரணை நடத்தி வருகிறார்கள்.

நதானியல் பற்றி செலினாவின் தந்தை கேரி முன்ட்ஸ் கூறுகையில்,

என் மகள் கடந்த ஜூன் மாதம் எங்கள் வீட்டில் இருந்து வெளியேறி ஹென்றியின் வீட்டிற்கு சென்றுவிட்டார். அதில் இருந்து நான் அவரை சந்திப்பதும் இல்லை, பேசுவதும் இல்லை. என் பேரனையும் நான் ஜூன் மாதம் பார்த்தது தான். அவன் எப்பொழுதும் சிரித்துக் கொண்டே இருக்கும் மகிழ்ச்சியான குழந்தை.

என் மகளை நான் நேசிக்கிறேன். இந்த சம்பவத்தை நினைத்திருந்தால் தடுத்திருக்கலாம் என்றார்.

English summary

A 18-year old man has been arrested in New York for accidentally killing his girlfriend's 7-month old son while cleaning his gun.