தாய்ப்பால் விழிப்புணர்வு விளம்பரத்தில் சர்ச்சை.. இது மெக்ஸிகோவில்!

மெக்ஸிகோ சிட்டி: மெக்ஸிகோவில் தாய்ப்பால் தருவதன் முக்கியத்துவத்தை வலியுறுத்தும் வைக்கப்பட்ட விழிப்புணர்வு விளம்பரம் அங்கு சர்ச்சையைக் கிளப்பியுள்ளது.

தாய்ப்பாலின் அருமை பெருமைகளை சொல்வதற்குப் பதில் பெண்களின் ஆபாசப் படத்தை வைத்து விட்டதாக குற்றச்சாட்டு எழுந்துள்ளது. தாய்ப்பால் தருவது போன்ற படத்தை வைத்திருந்தாலாவது பரவாயில்லை. மாறாக இரு பெண்கள் தங்களின் வெற்று மார்பகங்களுடன் போஸ் தருவது போன்ற படத்தை வைத்து கவர்ச்சியைக் காட்டியுள்ளதாகவும், பெண்களை தவறாக சித்தரித்துள்ளதாகவும் எதிர்ப்பு கிளம்பியுள்ளது.

தாய்ப்பால் குறித்த விழிப்புணர்வு பிரசாரத்தின் ஒரு பகுதியாக ஒரு விளம்பர போஸ்டர்களை வெளியிட்டுள்ளனர். அதில் இரு பிரபலமான பெண்கள் உள்ளனர். இருவரும் மேலாடை அணியாமல், வெற்று மார்புகளுடன் நிற்கிறார்கள். அவர்களது மார்பகங்களை மறைத்தபடி ஒரு வாசகம் உள்ளது. அதில், உங்களது குழந்தைகளுக்கு முதுகைக் காட்டாதீர்கள்.. உங்களது மார்பகங்களை அவர்களுக்குக் கொடுங்கள் என்று கூறப்பட்டுள்ளது.

இதுகுறித்து தாய்ப்பால் உரிமைக் குழுவின் தலைவரான ரெஜீனா தாமஸ் கூறுகையில், இது பெண்களை செக்ஸ் பொருளாக காட்டுவது போல உள்ளது. தாய்ப்பால் தருவதன் முக்கியத்துவம் குறித்து அதில் ஒரு வார்த்தை கூட இல்லை. மாறாக பெண்களை இழிவுபடுத்துவது போல உள்ளது. இது தவறான கருத்தையே வெளிப்படுத்துவதாக உள்ளது.

மேலும் தாய்ப்பால் தருபவர்கள் மட்டுமே நல்ல தாயார், மற்றவர்கள் கெட்ட தாய்மார்கள் என்பது போலவும் இது உள்ளது என்றார்.

லத்தீன் அமெரிக்க நாடுகளிலேயே மெக்ஸிகோவில்தான் தாய்ப்பால் தரும் இளம் தாய்மார்களின் எண்ணிக்கை மிகவும் குறைவாக உள்ளதாம். இங்கு 14 சதவீத இளம் தாய்மார்கள்தான் தாய்ப்பால் தருகிறார்களாம். அதாவது குழந்தை பிறந்து முதல் 6 மாதங்களுக்கு இவ்வளவு குறைந்த அளவிலான பெண்களே தாய்ப்பால் தருகிறார்களாம்.

ஆனால் இப்படி தாய்ப்பால் தருவதில் மெக்ஸிகோ பெண்கள் தயக்கம் காட்டுவதற்கு பெண்கள் தரப்பில் வேறு சில காரணங்கள் கூறப்படுகின்றன. பிற நாடுகளைப் போல மெக்ஸிகோவில் புதுத் தாய்மார்களுக்கு பேறு கால விடுப்பு அதிகம் அளிக்கப்படுவதில்லை. மேலும் ஊட்டச் சத்துக் குறைபாடும் அங்கு அதிகம். எனவேதான் தங்களால் அதிக காலத்திற்கு தாய்ப்பால் தர முடிவதில்லை என்கிறார்கள் இளம் தாய்மார்கள்.

மேலும் வேலை நேரத்தின்போது தாங்கள் தாய்ப்பால் கொடுக்க நிறுவனங்களால் அனுமதிக்கப்படுவதில்லை என்பதும் இளம் தாய்மார்களின் இன்னொரு குற்றச்சாட்டாகும்.

English summary

Mexico City’s new health campaign to encourage new mothers to nurse has left a sour taste in health advocates’ mouths due to campaign posters that feature topless celebrities. The posters show famous women without shirts or bras on, with a banner reading, “No les des la espalda, dale pecho” or “Don’t turn you back on them, give them your breast,” strategically placed across their chests. Health advocates are peeved that the campaign both sexualizes women and faults those who choose not to breastfeed, rather than simply emphasizing the benefits of doing so.