முஸ்லீம்களுக்கு எதிராக ட்வீட் போட்ட பியூர்டோ ரிகோ அழகி சஸ்பெண்ட்
நியூயார்க்: முஸ்லீம்களுக்கு எதிராக ட்விட்டரில் கருத்து தெரிவித்த பியூர்டோ ரிகோ அழகி டெஸ்டினி வெலஸ் அழகிப் போட்டிகளில் கலந்து கொள்ள முடியாமல் சஸ்பெண்ட் செய்யப்பட்டுள்ளார்.
முஸ்லீம்களை அமெரிக்காவுக்குள் விடாமல் தடை செய்ய வேண்டும் என்று அமெரிக்க அதிபர் தேர்தலில் போட்டியிடும் டொனால்ட் டிரம்ப் தெரிவித்தார். அதற்கு எதிர்ப்பு தெரிவிக்கும் வகையில் பிரபல ஆவணப்பட இயக்குனர் நியூயார்க் நகரில் உள்ள டிரம்ப் டவர் முன்பு தனது கையில் 'நாங்கள் எல்லாம் முஸ்லீம்' என்ற வாசகம் அடங்கிய கார்டுடன் நின்றார்.
இதை பார்த்த பியூர்டோ ரிகோ அழகி டெஸ்டினி வெலஸ்(20) கடுப்பாகி ட்விட்டரில் முஸ்லீம்களுக்கு எதிராக கருத்து தெரிவித்தார். இது குறித்து வாலஸ் ட்விட்டரில் கூறியிருந்ததாவது,
முஸ்லீம்கள் நம் அமைப்புகளை பயன்படுத்தி அமெரிக்காவில் தீவிரவாத தாக்குதல் நடத்துகிறார்கள். நமக்கு எண்ணெய்யை அளித்துவிட்டு இந்த நாட்டை தீவிரவாதமயாக்கியது தான் முஸ்லீம்கள் செய்தது.
யூதர்கள், கிறிஸ்தவர்கள் மற்றும் முஸ்லீம்களை ஒப்பிட்டுப் பார்க்கக் கூடாது. யூதர்கள் மற்றும் கிறிஸ்தவர்களின் புனித நூல்களில் தீவிரவாதம் பற்றி எதுவும் இல்லை என்று தெரிவித்தார்.
அவரது ட்வீட்களை பார்த்த பலரும் கடும் கண்டனம் தெரிவித்தனர். இந்நிலையில் அவரது ட்விட்டர் பக்கம் முடக்கப்பட்டது. பின்னர் வெலஸ் தனது செயலுக்காக மன்னிப்பு கேட்டார். வெலஸை அழகிப் போட்டிகளில் கலந்து கொள்ள முடியாமல் காலவரையின்றி சஸ்பெண்ட் செய்துள்ளது மிஸ் பியூர்டோ ரிகோ அமைப்பு.
Click it and Unblock the Notifications
Sign in with Google