சவுதியில் தென்பட்டது பிறை.. நாளை முதல் ரமலான் நோன்பு ஆரம்பம்.. தமிழ்நாட்டில் எப்போது?

சவுதி: சவூதி அரேபியாவில் இன்று பிறை தென்பட்ட நிலையில் நாளை (மார்ச் 11) முதல் அங்கு ரமலான் நோன்பு துவங்க உள்ளதாக அறிவிக்கப்பட்டுள்ளது.

ஒவ்வொரு ஆண்டும் இஸ்லாமிய காலண்டரின் 9வது மாதத்தில் ரம்ஜான் பண்டிகை கொண்டாடப்பட்டு வருகிறது. ரம்ஜான் பண்டிகை கொண்டாடுவதற்கு முன்பாக இஸ்லாமியர்கள் ஒரு மாத காலம் நோன்பு இருப்பார்கள். நோன்பு காலத்தில் இஸ்லாமியர்கள் அதிகாலையில் சாப்பிட்ட பின்னர் சூரியன் மறையும் வரை எதுவும் உண்ணாமல் நோன்பு இருப்பார்கள். பிறை கணக்குபடி 29 அல்லது 30 நாட்கள் நோன்பு இருப்பது இஸ்லாமியர்களின் வழக்கம்.

ரமலான் நோன்பு காலத்தில் உணவு உண்ணாமல், நீர் பருகாமல் நோன்பு இருக்கும் இஸ்லாமியர்கள், மாலையில் நோன்பு கஞ்சி சாப்பிட்டு நோன்பை முடிப்பார்கள். மேலும் இப்தார் விருந்து உண்பதும் கடைப்பிடிக்கப்பட்டு வருகிறது. ஒவ்வொரு ஆண்டும் பிறை பார்த்தே நோன்பு கடைப்பிடித்தலை இஸ்லாமியர்கள் தொடங்குவார்கள்.

சவூதி அரேபியாவில் இன்று (மார்ச் 10) ரமலான் பிறை பார்க்கும் நிகழ்வு நடந்தது. அதன்படி சவூதி அரேபியாவில் இன்று பிறை தென்பட்டுள்ளது. இதனால் நாளை (மார்ச் 11 - திங்கடிழமை) முதல் ரமலான் மாதம் நோன்பு தொடங்குவதாக அறிவிக்கப்பட்டுள்ளது. இன்று இரவு இஷா தொழுகைக்குப் பிறகு தராவீஹ் தொழுகை நடைபெறும் என அறிவிக்கப்பட்டுள்ளது.

இன்று ஷபான் மாதத்தின் கடைசி நாள் என்றும் நாளை (மார்ச் 11) ரமலான் மாதத்தின் முதல் நாள் என்றும் சவுதி அரேபியாவின் பிறை பார்க்கும் கமிட்டி அறிவித்துள்ளது. அதன்படி, நாளை முதல் ரமலான் நோன்பு தொடங்குகிறது. ரமலான் நோன்பின் முதல் நாள் நாளை கடைபிடிக்கப்படுகிறது.

ஐக்கிய அரபு அமீரகம் உள்ளிட்ட வளைகுடா நாடுகள் சவுதி அரேபியாவையே பின்பற்றும் என்பதால், குவைத், கத்தார், பஹ்ரைன் உள்ளிட்ட வளைகுடா நாடுகளில் நாளை முதல் ரமலான் நோன்பு ஆரம்பம் ஆகிறது.

தமிழ்நாட்டை பொறுத்தவரை, பொதுவாக சவூதி அரேபியாவுக்கு மறுநாள் ரமலான் நோன்பு தொடங்கும். எனவே வரும் செவ்வாய்க்கிழமை இங்கு ரமலான் தொடங்க வாய்ப்புள்ளது. இருப்பினும் பிறை பார்த்தே ரமலான் நோன்பு அறிவிப்பு வெளியாகும்.

English summary

As the crescent moon has been sighted in Saudi Arabia today, it has been announced that Ramadan fasting will start from tomorrow (March 11).