விண்வெளியில் 16 முறை 2015ம் ஆண்டை 'சந்தித்த' நாசா விஞ்ஞானிகள்!

வாஷிங்டன்: பூமியில் உள்ள நாம் 2015 புத்தாண்டை ஒருமுறை கொண்டாடியுள்ளோம். ஆனால் விண்வெளி ஆய்வில் ஈடுபட்டுள்ள நாசா விஞ்ஞானிகளோ நேற்று 16 முறை புத்தாண்டை கொண்டாடியுள்ளனர்.

அமெரிக்க விண்வெளி ஆய்வு அமைப்பான நாசாவின் சார்பில் விண்ணில்சுற்றி வரும் சர்வதேச விண்வெளி ஸ்டேஷனில் பணியாற்றும் ஆறு விஞ்ஞானிகள் நம்மைப்போல புத்தாண்டை வரவேற்க முடியாமல் போயிருக்கலாம். ஆனால் அவர்களை போல உலகில் வேறு யாராலும் புத்தாண்டை வரவேற்றிருக்க முடியாது என்பதே உண்மை.

இந்த ஆய்வு நிலையம் மணிக்கு 28 ஆயிரம் கிலோ மீட்டர் வேகத்தில் பூமியை சுற்றி வரும் வகையில் வடிவமைக்கப்பட்டுள்ளது. எனவே உலகின் பல மூலைகளிலும் புத்தாண்டு பிறந்தபோது விண்வெளி நிலையம் அப்பகுதிகளில் சுற்றியபடி இருந்துள்ளது. எனவே ஒவ்வொரு முறையும் இந்த விஞ்ஞானிகளுக்கு அது புது விடியலாக இருந்தது.

இவ்வாறு ஜனவரி 1ம்தேதி, 12 மணிக்கு பிறகு 16 முறை விடியலை சந்தித்துள்ளது இந்த குழு. இக்குழுவிலுள்ள விஞ்ஞானி பார்ரி வில்மோர் மற்றும் டெர்ரி விர்ட்ஸ் இருவருமே பூமியிலுள்ள மனிதர்களுக்கு தங்கலது புத்தாண்டு வாழ்த்துகளை தெரிவித்துக் கொண்டுள்ளனர்.

English summary

The crew of Expedition 42 orbiting the Earth in the International Space Station celebrated New Year's eve as many as 16 times as it circles the globe at 28,163 km per hour, NASA said.