மீண்டும் பரவும் கொரோனா.. மனித செல்களை எளிதில் தாக்குமா புதிய PJ.2.1 வேரியண்ட்? ஏன் ஆபத்து தெரியுமா?

ஒட்டாவா: கனடாவில் முதன்முதலில் கண்டறியப்பட்ட புதிய கோவிட் வேரியண்டான PJ.2.1, அமெரிக்கா, ஐரோப்பா, ஆசியா உள்ளிட்ட பல்வேறு பகுதிகளில் வேகமாகப் பரவி வருகிறது. இந்த வேரியண்ட்டிற்கு மனித செல்களை தாக்கும் திறன் அதிகமாக இருக்கலாம் என்று ஆய்வாளர்கள் எச்சரித்துள்ளனர். குறிப்பாக வைரஸ் மனித செல்களுக்குள் நுழைய உதவும் ACE2 குறைவாக உள்ள செல்களையும் எளிதில் பாதிக்கக்கூடும் என ஆய்வாளர்கள் எச்சரித்துள்ளனர்.

கொரோனா வைரஸில் இருந்து நாம் முழுமையாக மீண்டு சில ஆண்டுகள் ஆகிவிட்டது. ஆனாலும், கொரோனா ஏற்படுத்திய இழப்பும் வலியும் அவ்வளவு சீக்கிரம் நம்மால் கடந்துவிட முடியாது. இந்த சூழலில் தான் இப்போது மீண்டும் புதிய வகை கொரோனா குறித்த தகவல்கள் நம்மை அதிர வைத்திருக்கிறது.

கொரோனா

"ஜர்னல் ஆஃப் இன்ஃபெக்ஷன்" என்ற இதழிலில் இது குறித்த தகவல் வெளியாகியுள்ளது. அதில் கடந்த மே 2ம் தேதி கனடாவின் ஒன்டாரியோ மாகாணத்தில் இந்த புதிய PJ.2.1 கொரோனா வேரியண்ட் முதன்முதலில் கண்டறியப்பட்டது. அமெரிக்காவில் ஜூன் 30ம் தேதி நியூயார்க்கில் முதல் பாதிப்பு உறுதி செய்யப்பட்டது. பின்னர் கலிபோர்னியா, அரிசோனா, நியூஜெர்சி உள்ளிட்ட பல மாகாணங்களுக்கும் பரவியது. சிங்கப்பூர், ஆஸ்திரேலியா, நியூசிலாந்து, இஸ்ரேல், பிரான்ஸ், ஸ்பெயின் ஆகிய நாடுகளிலும் இது கண்டறியப்பட்டுள்ளது.

புதிய வேரியண்ட்

இந்த PJ.2.1 வேரியண்ட் 'சால்டேஷன்' அல்லது 'ஷிப்ட்' வேரியண்ட் என வகைப்படுத்தப்பட்டுள்ளது. வழக்கமான வேரியண்ட்கள் படிப்படியாக சில மரபணு மாற்றங்களை பெறும். ஆனால், இந்த வகை வேரியண்ட்கள் ஒரே நேரத்தில் அதிக எண்ணிக்கையிலான மரபணு மாற்றங்களை கொண்டிருக்கும். நீண்டகால தொற்றுக்கு உள்ளானவர்களின் உடலில் இத்தகைய மாற்றங்கள் முதலில் உருவாகுமாம். பிறகு அது மக்களிடையே வேகமாக பரவும் என ஆய்வாளர்கள் கருதுகின்றனர்.

இருப்பினும், தடுப்பூசி மூலம் நமக்கு கிடைக்கும் எதிர்ப்பாற்றலை தவிர்க்கும் திறன் PJ.2.1க்கு அதிகமாக இல்லை. சில கொரோனா தடுப்பூசிகளின் செயல்திறன் இந்த PJ.2.1க்கு எதிராக குறைவாக இருந்தாலும் பெரிய பாதிப்புகள் ஏற்படுவதில்லை என்றே ஆய்வாளர்கள் கூறியுள்ளனர்.

வைரஸின் ஸ்பைக்

பொதுவாக ஒரு வைரஸின் ஸ்பைக் புரதம், மனித செல்களில் உள்ள ACE2 ஏற்பியுடன் இணைந்துதான் உடலுக்குள் நுழைகிறது. ஆய்வக சோதனையில் PJ.2.1 இந்த ஏற்பியுடன் வலுவாக இணையும் திறனை கொண்டிருப்பது உறுதியாகியுள்ளது. ACE2 ஏற்பியை தடுக்கும் ஆன்டிபாடி சோதனையில், மற்ற வேரியண்ட்களைவிட PJ.2.1 குறைந்த அளவே இருந்துள்ளது. இதனால் இந்த குறிப்பிட்ட வேரியண்ட்டால் சிறுநீரக செல்களில் கூட எளிதாக நுழைய முடிகிறதாம். இதனால் இது வேகமாக பரவும் எனவும் உடம்பில் பல உறுப்புகளை பாதிக்கும் எனவும் ஆய்வாளர்கள் கருதுகின்றனர்.

ஆபத்து இல்லை

உலகில் இப்போது மற்ற வேரியண்ட்கள் பரவினாலும் கூட அவை பெரியளவில் ஆபத்தை ஏற்படுத்துவதில்லை. இந்த PJ.2.1 வேரியண்ட் தான் உலகெங்கும் வேகமாக பரவி வருகிறது. அதிலும் குறிப்பாk 70 வயதுக்கு மேற்பட்டவர்களிடம் இது அதிகமாகவே பரவுகிறது. அதேநேரம் இந்த ஆய்வு ஆரம்பக்கட்ட ஆய்வுதான் என்பதால், PJ.2.1ன் உண்மையான பாதிப்பு, நோயின் தீவிரம் குறித்து உறுதியாக கூற முடியாது என்றே ஆராய்ச்சியாளர்கள் தெரிவித்துள்ளனர்.

கொரோனாவை பொறுத்தவரை அது பெருந்தொற்று என்பதில் இருந்து மாறி, சமூகத்தில் நீடித்து இருக்கும் நோயாக மாறிவிட்டது. ஒவ்வொரு ஆண்டும் மழை காலத்தில் கொரோனா பரவல் அதிகரித்தாலும் கூட அது முன்பு போல தீவிர பாதிப்பையோ அல்லது உயிரிழப்புகளையோ ஏற்படுத்துவதில்லை என ஆய்வாளர்கள் கூறுகிறார்கள்.

English summary

New Corona variant: New COVID Variant PJ.2.1 Spreading Across Countries: What Researchers Warn