நியூயார்க் டாக்டரை தாக்கிய 'எபோலா' வைரஸ்: பீதியில் மக்கள்
நியூயார்க்: கினியாவில் எபோலா நோயாளிகளுக்கு சிகிச்சை அளித்த அமெரிக்க டாக்டரை எபோலா வைரஸ் தாக்கியுள்ளது.
மேற்கு ஆப்பிரிக்க நாடுகளான நைஜீரியா, லைபீரியா, கினியா, சியர்ரா லியோனில் எபோலா வைரஸ் 5 ஆயிரத்திற்கும் மேற்பட்டோரின் உயிரை குடித்துள்ளது. இந்நிலையில் கினியாவில் எபோலா நோயாளிகளுக்கு சிகிச்சை அளித்து வந்த அமெரிக்க டாக்டர் கிரெய்க் ஸ்பென்சர்(33) கடந்த 14ம் தேதி அமெரிக்கா திரும்பினார்.
நியூயார்க்கில் வசிக்கும் அவருக்கு கடந்த 21ம் தேதியில் இருந்து உடல்நலம் பாதிக்கப்பட்டது. இந்நிலையில் வியாழக்கிழமை அவருக்கு 103 டிகிரி காய்ச்சல், வாந்தி உள்ளிட்ட எபோலாவின் அறிகுறிகள் தென்பட்டன. இதையடுத்து நியூயார்க்கில் உள்ள பெலுவே மருத்துவமனையில் அவர் அனுமதிக்கப்பட்டார். அவரை பரிசோதனை செய்ததில் அவரை எபோலா வைரஸ் தாக்கியிருப்பது தெரிய வந்தது.
அவரை தனிமைப்படுத்தி மருத்துவர்கள் சிகிச்சை அளித்து வருகிறார்கள். இந்நிலையில் இது குறித்து நியூயார்க் மேயர் கூறுகையில்,
நியூயார்க் மக்கள் யாரும் பீதி அடைய வேண்டாம். ஒரே தெருவில் வசிப்பதாலோ, எபோலா நோயாளி வீட்டுக்கு அருகே இருப்பதாலோ யாருக்கும் எபோலா வந்துவிடாது என்று தெரிவித்துள்ளார்.
Click it and Unblock the Notifications
Sign in with Google