‘தாதா’ அமெரிக்காவின் கடைசி பக்கங்களை நாங்களே எழுதுவோம்...: கொழந்தசாமி எச்சரிக்கை

Published: Friday, February 6, 2015, 15:15 [IST]

Subscribe to Oneindia Tamil

பியாங்ஹாங்: 'எங்களை வீழ்த்த நினைக்கும் அமெரிக்காவை அழிப்போம், அவர்களின் கடைசி பக்கத்தை நாங்களே எழுதுவோம்' என வடகொரியா மிரட்டல் அறிக்கை ஒன்றை வெளியிட்டுள்ளது.

தென் கொரியா - அமெரிக்க படைகள் வரும் மார்ச் மாதம் வழக்கமான தங்களது ராணுவ கூட்டுப் பயிற்சியை துவங்க உள்ளன. இந்த முறை ராணுவ கூட்டுப் பயிற்சி நடத்தப்பட்டால் அதற்கு எதிராக அணு ஆயுத சோதனை நடத்தப்படும் என்றும் வட கொரியா எச்சரித்துள்ளது.

இந்நிலையில், வட கொரிய அதிபர் கிம் ஜாங் வசம் இருக்கும் தேசிய பாதுகாப்பு ஆணையம் சார்பில், ‘அமெரிக்க ஏகாதிபத்தியவாதிகள் இறுதி தண்டனையைச் சந்திப்பீர்கள்' என்ற தலைப்பில் அறிக்கை ஒன்று வெளியிடப்பட்டுள்ளது.

அந்த அறிக்கையில் கூறப்பட்டுள்ளதாவது:-

போர்ச் சூழலை கொளுத்தி போட்டு அதனை தீவிரப்படுத்தும் வேலைகளை அமெரிக்கா செய்கிறது. வட கொரியாவின் பலத்தை வீழ்த்த அனைத்து வழியிலும் அமெரிக்கா முயற்சித்து வருகிறது.

தாதா அரசியல் நடத்தும் அமெரிக்கா: இது போன்ற மிரட்டலால் ஏகாதிபத்தியவாதிகளாக இருக்க விரும்பும் அமெரிக்காவுடன் உடன்பட வேண்டிய அவசியம் எங்களுக்கு ஏதும் இல்லை.

தாதாவாக வலம் வரும் அமெரிக்காவுடன் பேச்சுவார்த்தை நடத்தி முடிவை ஏற்படுத்த எப்போதும் வட கொரிய மக்களும் ராணுவமும் விரும்பவில்லை.

அமெரிக்க வரலாற்றின் கடைசிப் பக்கங்களை எழுதப்போவது வட கொரியாவாகத்தான் இருக்கும். இதற்காக தரைவழி, வான்வழி, கடல்வழி, கடலுக்குகீழ் , அணுசக்தி தாக்குதல் , சைபர் மோதல் என எந்த வகையிலான தாக்குதல்களையும் நாங்கள் அமெரிக்கா மீது நடத்த தயாராக இருக்கிறோம்' என இவ்வாறு அதில் தெரிவிக்கப்பட்டுள்ளது.

சமீபத்தில் வட கொரியா மேற்கொண்டு வரும் அணு ஆராய்ச்சித் திட்டங்கள் தொடர்பாக அந்நாட்டு அதிகாரிகளுடன் அமெரிக்க அதிகாரிகள் சிங்கப்பூரில் சந்தித்துப் பேச்சு நடத்தினர். ஆனால் இந்த சந்திப்பின்போது அமெரிக்காவுடனான பேச்சுவார்த்தை நடத்த உடன்பாடு இல்லை என்று வட கொரியா தெரிவித்தது.

இதனை அடுத்து கடந்த ஜனவரி 22-ஆம் தேதி சைபர் தாக்குதல் குறித்து பேசியிருந்த அமெரிக்க அதிபர் ஒபாமா வடகொரியாவைக் குறிப்பிட்டு, "உங்களது ராஜ்ஜியம் வீழ்வதை கண்கூடாக பார்க்கும் நேரம் வரும்" என்று காட்டமாக பேசியிருந்தார்.

ஒபாமாவின் பேச்சுக்கான பதிலடியாக, அமெரிக்காவை எச்சரித்து வடகொரியா இந்த அறிக்கை வெளியிட்டுள்ளது குறிப்பிடத்தக்கது.

Published On February 6, 2015