அப்ப, இன்னும் ஒபாமா "தம்"மை விடலையா...??
பான், ஜெர்மனி: அமெரிக்க அதிபர் பராக் ஒபாமா சிகரெட்டை விட்டு விட்டதாக கூறப்பட்டாலும் கூட சமீபத்தில் வெளியாகியுள்ள ஒரு புகைப்படம், அவர் இன்னும் சிகரெட்டை விடவில்லையோ என்ற சந்தேகத்தைக் கிளப்பியுள்ளது.
ஜெர்மனியில் நடந்த ஜி 7 உச்சி மாநாட்டில் கலந்து கொள்ள சென்றிருந்த ஒபாமா அங்கு ஒரு ஒதுக்குப்புறமான இடத்தில், இத்தாலி பிரதமர் மட்டியோ ரென்ஸியுடன் பேசிக் கொண்டிருந்தபோது, அவரது கையில் சிகரெட் பாக்கெட் போல ஒன்று வைத்திருந்தது சலசலப்பைக் கிளப்பியுள்ளது. ஒபாமா கையில் இருந்தது சிகரெட் பாக்கெட்தான் என்று கூறப்படுகிறது.
ஒரு கையில் சிகரெட் பாக்கெட்டை சுற்றிப் பிடித்துள்ள ஒபாமா அதிலிருந்து ஒன்றை எடுக்க முயல்வதும் புகைப்படத்தில் பதிவாகியுள்ளது. ஜெர்மனியின் ஸ்லோஸ் எல்மா நகரில் நடந்த ஜி 7 உச்சி மாநாட்டின்போதுதான் இப்படி கையும் களவுமாக பிடிபட்டுள்ளார் ஒபாமா.
இரு தலைவர்களும் ஏதோ சீரியஸாக பேசிக் கொண்டுள்ளனர். அப்போது இந்தப் படம் எடுக்கப்பட்டுள்ளது. இதை இத்தாலி பிரதமரின் செய்தித் தொடர்பாளர் பிலிப்போ சென்சி இன்ஸ்டாகிராமில் போட்டு விட, இப்போது வைரலாகி விட்டது. சென்சியும் புகை பிடிப்பாரா என்று தெரியவில்லை. ஆனால் அவரும் புகை பிடித்திருக்கலாம் என்றே சந்தேகிக்கப்படுகிறது.
இளம் வயதில் புகை பிடித்தவர் ஒபாமா. இருப்பினும் பொது இடத்தில் அவர் மிக மிக அரிதாகவே புகை பிடிப்பார். இடையில் விட்டு விட்டதாக கூற தகவல்கள் வெளியாகின. நிக்கோட்டின் கம் பயன்படுத்தி வருவதாகவும் கூறப்பட்டது. இந்த நிலையில் மீண்டும் சிகரெட் பாக்கெட்டும் கையுமாக அவர் சிக்கியுள்ளார்.
கடந்த 2011ம் ஆண்டு பிப்ரவரி மாதம் ஒபாமாவின் மனைவி மிஷல் கூறுகையில், எனது கணவர் சிகரெட்டை விட்டு ஒரு வருடமாகி விட்டது என்று கூறியிருந்தார் என்பது நினைவிருக்கலாம்.
2009ம் ஆண்டு அளித்த அவரது பேட்டியின்போது நான் சிகரெட்டை விட முடியாமல் தடுமாறுகிறேன். தினசரி சிகரெட் புகைக்காமல் இருக்க முடியவில்லை. ஆனால் செயின் ஸ்மோக்கர் அல்ல என்று கூறியிருந்தார் ஒபாமா.