துருக்கி சுட்டு வீழ்த்திய விமானத்தின் ஒரு விமானி உயிருடன் மீட்கப்பட்டதாக ரஷ்யா அறிவிப்பு!!

டமாஸ்கஸ்: துருக்கியால் சுட்டு வீழ்த்தப்பட்ட விமானத்தில் இருந்த ஒரு விமானி உயிருடன் மீட்கப்பட்டுள்ளதாக ரஷ்யா அறிவித்துள்ளது.

துருக்கி-சிரியா எல்லையில் ரஷ்யாவின் போர் விமானத்தை நேற்று துருக்கி சுட்டு வீழ்த்தியது. இது சர்வதேச அளவில் பதற்றத்தை ஏற்படுத்தியுள்ளது.

மேலும் ரஷ்யாவின் போர் விமானத்தை இயக்கிய 2 விமானிகளும் பாராசூட்டில் குதித்து தப்பிய போது நடுவானில் வைத்து இருவரும் சுட்டுப் படுகொலை செய்யப்பட்டதாகவும் தகவல்கள் வெளியாகின. அதே நேரத்தில் ஒரு விமானிதான் உயிரிழந்ததாகவும் மற்றொரு விமானி, ப்ரீ சிரியா ஆர்மி தீவிரவாதிகள் வசம் இருப்பதாகவும் தகவல்களும் உறுதிப்படுத்தப்படாத வீடியோ காட்சிகளும் வெளியாகி இருந்தன.

மேலும் விமானிகளை தேடிச் சென்ற ரஷ்யா ஹெலிகாப்டர் ஒன்றையும் ப்ரீ சிரியா ஆர்மி தீவிரவாதிகள் ஏவுகணைகள் மூலம் தாக்கி அழித்த வீடியோவும் வெளியாகி இருந்தது. இதனால் ரஷ்யாவுக்கும் அமெரிக்கா, துருக்கி உள்ளிட்ட நாடுகளுக்கும் இடையே உறவு மிக மோசமாக பாதிக்கப்பட்டது.

இந்நிலையில் பாராசூட்டில் இருந்து குதித்த விமானிகளில் ஒருவர் உயிருடன் மீட்கப்பட்டுள்ளதாக ரஷ்யா அறிவித்துள்ளது. படுகாயமடைந்துள்ள அவர் ரஷ்யாவின் விமானப் படை முகாமில் பாதுகாப்பாக இருப்பதாகவும் தெரிவிக்கப்பட்டுள்ளது.

English summary

The second Russian pilot, who ejected from the Su-24 bomber shot down by Turkey on Tuesday over Syria is safe and sound and has been taken to the Russian airbase.