ஒரு கையுடன் விமானத்தை செலுத்திய விமானி.. தடுமாற்றத்துடன் தரையிறங்கிய விமானம்
பெல்பாஸ்ட்: ஒரு செயற்கைக் கையைப் பொருத்திய இங்கிலாந்தைச் சேர்ந்த விமானி ஒருவர், விமானத்தைத் தரையிறக்கியபோது அவரது செயற்கைக் கை தவறி விழுந்து விட்டதால் விமானத்தைத் தரையிறக்கும்போது பெரும் தடுமாற்றத்தைச் சந்தித்துள்ளார். அதிர்ஷ்டவசமாக விபத்து ஏதும் இல்லாமல் விமானம் தரையிறங்கியுள்ளது.
பிர்மிங்காமிலிருந்துடேஷ் 8 வகை சிறிய விமானம் ஒன்று பெல்பாஸ்ட் நகருக்கு வந்து கொண்டிருந்தது. அந்த விமானத்தில் 47 பயணிகள் இருந்தனர். விமானம் பெல்பாஸட் நகர விமான நிலையத்தை அடைந்தபோது தரையிறங்கும் சமயத்தில் 46 வயதான அந்த விமானியின் இடது செயற்கைக் கை திடீரென கழன்று விழுந்து விட்டது.
கையின் கிளாம்ப் கழன்றதால் கை விழுந்து விட்டது. இதனால் விமானி பதட்டமடைந்து விட்டார். விமானமும் தரையிறங்குவதில் தடுமாற்றத்தைச் சந்தித்தது. ஆனால் அதிர்ஷ்டவசமாக எந்தவிதமான விபரீதமும் இல்லாமல் விமானம் பத்திரமாக தரையிறங்கியது.
முதலில் இணை விமானியின் உதவியைக் கோர அவர் நினைத்துள்ளார். ஆனால் சமாளித்துக் கொள்ளக் கூடிய அளவில் அவகாசம் இருந்ததால் துணிச்சலுடன் தானே விமானத்தை பத்திரமாக இறக்கி விட்டார். வலது கரத்தால் சமாளித்து விமானத்தை பத்திரமாக அவர் தரையிறக்கி விட்டார்.
சற்று தடுமாற்றம் ஆனதால் விமானம் சற்று ஆடியபடி தரையைத் தொட்டு ஓடி நின்றது. இருப்பினும் விமானத்தில் இருந்த யாருக்கும் காயம் ஏதும் இல்லை. மேலும் விமானமும் கூட சேதம் அடையவில்லை என்பது குறிப்பிடத்தக்கது.