பாகிஸ்தானின் அணு ஆயுத ஏவுகணை சோதனை- அமெரிக்கா வார்னிங்!

வாஷிங்டன்: பாகிஸ்தான் தொடர்ந்தும் அணு ஆயுத ஏவுகணை தயாரித்து சோதனை நடத்துவதில் மும்முரம் காட்டி வருவதாக அமெரிக்கா எச்சரிக்கை விடுத்துள்ளது.

அணு ஆயுதங்களை சுமந்தபடி 350 கிலோ மீட்டர் தூரம் வரை பாய்ந்து சென்று தாக்கும் வல்லமையுள்ள ஏவுகணையை பாகிஸ்தான் சில நாட்களுக்கு முன்னர் வெற்றிகரமாக பரிசோதித்தது.

ராட் என பெயரிடப்பட்ட இதுபோன்ற சக்தி வாய்ந்த ஏவுகணைகள் உலகின் சில நாடுகளிடம் மட்டுமே உள்ளன என்றும் பாகிஸ்தான் ராணுவம் தெரிவித்துள்ளது. கடல் மற்றும் நிலப்பகுதியில் இருந்து அணு ஆயுதங்கள் மற்றும் வெடி பொருட்களை சுமந்தபடி புறப்பட்டு செல்லும் இவ்வகை நவீன ஏவுகணைகள் குறிப்பிட்ட இலக்கை வெகு துல்லியமாக தாக்கி அழிக்கும் ஆற்றல் படைத்தவையாகும்.

இந்த ஏவுகணை சோதனையைத் தொடர்ந்து அமெரிக்கா எச்சரிக்கை விடுத்துள்ளது. இது குறித்து அமெரிக்கா பாதுகாப்புத் துறை அதிகாரி வின்சென்ட் ஸ்டீவர்ட் கூறுகையில், பாகிஸ்தான் தொடர்ந்தும் அணு ஆயுதங்களை சுமந்து செல்லும் ஏவுகணைகளை பரிசோதிப்பதில் மும்முரம் காட்டி வருகிறது. பாகிஸ்தானின் இந்தப் போக்கு ஆபத்தானது.

மேலும், கைபர் மாகாணம் மற்றும் பழங்குடி இனத்தவர் பிரதேசங்களில் பாகிஸ்தான் ராணுவம் குவிக்கப்பட்டு வருகிறது. தீவிரவாதிகளின் எஞ்சிய பகுதிகளையும் அந்நாட்டு ராணுவம் இந்த ஆண்டுக்குள் அழித்து நிர்மூலமாக்கிவிடும் என்று எதிர்பார்க்கிறோம்.

பாகிஸ்தான் ராணுவம் இத்தகைய நடவடிக்கைகளை மேற்கொள்கிற போதும் தீவிரவாதிகள், பிரிவினைவாதிகளால் அதன் உள்நாட்டு பாதுகாப்புக்கு பெரும் அச்சுறுத்தல் நீடித்து வருகிறது.

ஆப்கானிஸ்தானில் நேட்டோ படைகள் குறைக்கப்படும் நிலையில் தலிபான்கள், அல்கொய்தா இயக்க தீவிரவாதிகள் தலையெடுக்க வாய்ப்பிருக்கிறது. ஆப்கான் ராணுவத்துக்கு அவர்கள் கடும் நெருக்கடி கொடுக்கக் கூடும் என்றும் அவர் தெரிவித்தார்.

English summary

The US has anticipated that Pakistan will continue developing cruise missiles and close-range "battlefield" nuclear weapons to augment its existing ballistic missiles, a top US intelligence official has said.