காரா அது?, அதனால் தான் என் அப்பா பலியானார்: போர்ஷா நிறுவனம் மீது நடிகர் பால் வாக்கரின் மகள் வழக்கு

கலிபோர்னியா: ஹாலிவுட் நடிகர் பால் வாக்கர் மரணம் குறித்து அவரது மகள் மெடோ போர்ஷா கார் நிறுவனம் மீது வழக்கு தொடர்ந்துள்ளார்.

பாஸ்ட் அன்ட் ஃபியூரியஸ் ஹாலிவுட் படத்தில் நடித்து பிரபலம் ஆனவர் பால் வாக்கர். அவர் கடந்த 2013ம் ஆண்டு நவம்பர் மாதம் 30ம் தேதி கலிபோர்னியா மாநிலத்தில் உள்ள சான்டா கிளாரிடாவில் தனது நண்பர் ரோஜர் ரோடாஸுடன் 2005ம் ஆண்டு மாடல் போர்ஷா கரேரா ஜிடி காரில் சென்றார்.

காரை ரோஜர் ஓட்டினார். இந்நிலையில் கார் கட்டுப்பாட்டை இழந்து மரங்களின் மீது மோதி பின்னர் மின் கம்பம் மீது மோதி தீப்பிடித்து எரிந்தது. இதில் காரில் இருந்த ரோஜர், பால் வாக்கர் ஆகிய இருவரும் உடல் கருகி பலியாகினர்.

மெடோ வாக்கர்

பால் வாக்கர் இறந்து இரண்டு ஆண்டுகள் கழித்து அவரது மரணம் தொடர்பாக அவரின் 16 வயது மகள் மெடோ வாக்கர் போர்ஷா நிறுவனம் மீது நீதிமன்றத்தில் வழக்கு தொடர்ந்துள்ளார்.

போர்ஷா

போர்ஷா கரேரா ஜிடி காரில் போதிய பாதுகாப்பு வசதிகள் இல்லை. அதன் டிசைனில் பல தவறுகள் உள்ளன. அதனால் தான் கார் தீப்பிடித்து எரிந்தது. போர்ஷா நிறுவனம் காரை முறையாக தயாரித்திருந்தால் என் தந்தை இறந்திருக்க மாட்டார் என மெடோ தனது மனுவில் தெரிவித்துள்ளார்.

ஆபத்தான கார்

போர்ஷா கரேரா ஜிடி ஒரு ஆபத்தான கார். தெருவில் ஓட்டிச் செல்ல அது லாயக்கு இல்லை. காரில் உள்ள தவறுகளால் தான் பால் வாக்கர் பலியானார் என்று மெடோவின் வழக்கறிஞர் ஜெப் மிலன் தெரிவித்துள்ளார்.

தாறுமாறாக ஓட்டி

பால் வாக்கர் பலியானதற்கு ஓவர் ஸ்பீட் மற்றும் தாறுமாறாக ஓட்டியது தான் காரணம் என்று ஏற்கனவே விசாரணையில் தெரிய வந்துள்ளது என போர்ஷா நிறுவனம் தெரிவித்துள்ளது.

English summary

Deceased Hollywood actor Paul Walker's 16-year old daughter Meadow has sued Porsche for her dad's death.