"கெமிஸ்ட்ரி" பிடிக்குமா.. அப்ப உங்களுக்கு இது ஸ்வீட்டான நியூஸ் பாஸ்!

டோக்கியோ: பீரியாடிக் டேபிள் எனப்படும் தனிம அட்டவணையில் புதிதாக நான்கு தனிமங்களை அறிவியலாளர்கள் சேர்த்துள்ளனர்.

அறிவியலின் மிகப் பழமையான அடிப்படை தனிம அட்டவணை பீரியாடிக் டேபிள். தற்போது இதில் புதிதாக 113, 115, 117, 118 ஆகிய இடங்களில் புதிய தனிமங்களை சேர்த்துள்ளனர். அதாவது டேபிளின் 7வது வரிசையில் இவை சேர்ந்துள்ளன.

டிசம்பர் 30ம் தேதி நடந்த சர்வதேச பியூர் அப்ளைட் கெமிஸ்ட்ரி கருத்தரங்கில் நடந்த தீவிர ஆய்வு மற்றும் விவாதத்திற்குப் பின்னர் இந்த முடிவு எடுக்கப்பட்டது.

அடையாளமில்லை...

இருப்பினும் இந்தப் புதிய தனிமங்களின் பெயர்களும், அடையாளமும் வெளியிடப்படவில்லை. இந்தப் புதிய தனிமங்களை ஜப்பான், ரஷ்யா, அமெரிக்காவைச் சேர்ந்த ஆய்வுக் குழு கண்டுபிடித்துள்ளது. விரைவில் இந்த புதிய தனிமங்களுக்கு பெயரும், அடையாளமும் தரப்படும்.

செயற்கையானவை...

இந்த புதிய தனிமங்கள் நான்கும் இயற்கையானவை அல்ல, மனிதர்களால் உருவாக்கப்பட்டதே. கடந்த 2004ம் ஆண்டு முதல் இந்தப் புதிய தனிமங்களை உருவாக்கும் பணிகள் நடந்து வந்தன. தற்போது அனைத்து சோதனைகளிலும் இந்த நான்கு தனிமங்களம் பாஸ் ஆகி விட்டதாக தெரிவிக்கப்பட்டுள்ளது. இதையடுத்து பீரியாடிக் டேபிளில் இவற்றுக்கு இடம் கிடைத்துள்ளது.

விரைவில் பெயர்...

இந்தப் புதிய தனிமங்களுக்கு நாடு அல்லது தாது அல்லது விஞ்ஞானியின் பெயர் என ஏதாவது ஒன்றை அடிப்படையாக வைத்து பெயிரடப்படும்.

தற்காலிகப் பெயர்...

தற்போதைக்கு 113வது தனிமத்திற்கு யுனன்ட்ரியம் (ununtrium). 115வது தனிமத்திற்கு யுனன்பென்டியம் (ununpentium) 117வது தனிமத்திற்கு யுனன்செப்டியம் (ununseptium) மற்றும் 118வது தனிமத்திற்கு யுனன்ஆக்டியம் (ununoctium) என தற்காலிகமாக பெயரிடப்பட்டுள்ளது.

English summary

The International Union of Pure and Applied Chemistry has announced that four new elements with atomic numbers of 113, 115, 117, and 118 will be added to the periodic table. The elements, discovered by scientists in Japan, Russia and the USA, are the first to be added to the table since 2011, when elements 114 and 116 were added.