ஜேம்ஸ் பாண்ட் நடிகர் பியர்ஸ் பிராஸ்னனின் சொகுசு பங்களாவில் தீ

By Siva

Published: Thursday, February 12, 2015, 16:29 [IST]

லாஸ் ஏஞ்சல்ஸ்: அமெரிக்காவின் மலிபு நகரில் உள்ள ஜேம்ஸ் பாண்ட் நடிகர் பியர்ஸ் பிராஸ்னனின் வீட்டில் தீ விபத்து ஏற்பட்டது.

டை அனதர் டே, தி வேர்ல்ட் இஸ் நாட் இனஃப் மற்றும் கோல்டன் ஐ ஆகிய படங்களில் ஜேம்ஸ் பாண்டாக நடித்தவர் பியர்ஸ் பிராஸ்னன். அவர் தனது மனைவி கீலி ஷாயே ஸ்மித்துடன் அமெரிக்காவின் கலிபோர்னியா மாநிலத்தில் உள்ள கடலோர நகரான மாலிபுவில் வசித்து வருகிறார்.

மாலிபுவில் உள்ள சொகுசு பங்களாவில் அவர் வசித்து வருகிறார். இந்நிலையில் நேற்று இரவு அவரது வீட்டின் கராஜில் தீப்பிடித்து அது மளமளவென பிற பகுதிகளுக்கு பரவி உள்ளது. இது குறித்து தீயணைப்பு துறையினருக்கு தகவல் கொடுக்கப்பட்டது.

தகவல் கிடைத்த உடன் 50 தீயணைப்பு வீரர்கள் சம்பவ இடத்திற்கு வந்து அரை மணிநேரம் போராடி தீயை அணைத்தனர். இந்த விபத்தில் வீடு சேதமடைந்துள்ளது. ஆனால் நல்லவேளையாக யாருக்கும் காயம் ஏற்படவில்லை.

தீ எரிவதை பார்த்த ஒருவர் அதை தனது செல்போனில் வீடியோ எடுத்து யூடியூப்பில் வெளியிட்டுள்ளார். மலிபு நகரில் தான் இயக்குனர் ஸ்டீவன் ஸ்பீல்பெர்க் உள்ளிட்ட பல ஹாலிவுட் பிரபலங்கள் வசித்து வருகிறார்கள் என்பது குறிப்பிடத்தக்கது.