ஏழைகளின் ஏவுகணை.. இஸ்ரேல், அமெரிக்காவை அதிரவைக்கும் ஈரானின் குட்டி ஜாம்பவான்.. கேம் சேஞ்சர்

Updated: Friday, March 6, 2026, 14:47 [IST]

Subscribe to Oneindia Tamil

தெஹ்ரான்: உக்ரைன் போர்க்களத்தில் ரஷ்யா பயன்படுத்தியபோது உலகையே உற்றுநோக்க வைத்த அந்த 'ஷாஹித்' (Shahed-136) டிரோன்கள், இப்போது வளைகுடா நாடுகளின் தூக்கத்தைக் கலைத்துக் கொண்டிருக்கின்றன. இஸ்ரேல் மற்றும் அமெரிக்காவின் அதிரடித் தாக்குதல்களுக்குப் பதிலடியாக ஈரான் கையில் எடுத்திருக்கும் 'காமிகாஸே' (Kamikaze) டிரோன்கள்.. ரஷ்யாவின் 'ஷாஹித்' (Shahed-136) டிரோன்கள் போலவே இயங்க கூடியவர். இது நவீன போர்க்கலையின் முகத்தையே மாற்றி வருகின்றன.

என்ன இந்த 'ஷாஹித்' ஸ்பெஷல்?

பார்ப்பதற்கு ஒரு சாதாரண 'புஷ்-புரொப்பல்லர்' ரக விமானம் போலத் தெரிந்தாலும், இதன் தாக்கம் அதீதமானது. சுமார் 3.5 மீட்டர் நீளம், 2.5 மீட்டர் இறக்கை அகலம் கொண்ட இந்த டிரோன்கள், 30 முதல் 50 கிலோ வெடிபொருட்களைச் சுமந்து கொண்டு, இலக்கை நோக்கிச் சீறிப் பாய்ந்து தற்கொலைத் தாக்குதல் நடத்தும் திறன் கொண்டவை.

இதை ராணுவ வல்லுநர்கள் "ஏழைகளின் குரூஸ் ஏவுகணை" (Poor man's cruise missile) என்றே அழைக்கிறார்கள். ஒரு நவீன ஏவுகணை பல கோடி ரூபாய் செலவில் உருவாக்கப்படும் நிலையில், இந்த டிரோன்கள் வெறும் 15 முதல் 40 லட்ச ரூபாய்க்குள் தயாராகி விடுகின்றன.

"கூட்டம் கூட்டமாக வரும் ஆபத்து!"

ஈரானின் பலம் அதன் தொழில்நுட்பத்தில் இல்லை; அதன் எண்ணிக்கையில் இருக்கிறது. வளைகுடா நாடுகள் பயன்படுத்தும் அதிநவீன 'பேட்ரியாட்' (Patriot) போன்ற பாதுகாப்பு அமைப்புகள் ஒரு ஏவுகணையைத் தடுக்கச் செலவிடும் தொகை சுமார் 30 முதல் 100 கோடி ரூபாய். ஆனால், ஈரான் அனுப்பும் ஒரு டிரோனின் விலையோ மிகக் குறைவு.

"குறைந்த விலையில் அதிக சேதத்தை ஏற்படுத்துவதுதான் ஈரானின் திட்டம்" என்கிறார் ராணுவ ஆய்வாளர் பாட்ரிசியா பாஸில்க். நூற்றுக்கணக்கான டிரோன்களை ஒரே நேரத்தில் 'ஸ்வார்ம்' (Swarm) முறையில் ஏவும்போது, எந்தவொரு நவீன பாதுகாப்பு அமைப்பும் திணறித்தான் போகும். சமீபத்தில் ஐக்கிய அரபு அமீரகத்தின் மீது ஏவப்பட்ட 941 டிரோன்களில் 65 இலக்கை எட்டியுள்ளன. இவை முக்கியமான துறைமுகங்கள் மற்றும் தரவு மையங்களைச் சேதப்படுத்தியுள்ளன.

ஈரானின் இந்த 'ஷாஹித்' டிரோன்கள் பிப்ரவரி 2026-ல் நடந்த தாக்குதல்களில் வளைகுடா நாடுகளின் பல முக்கிய இடங்களை நிலைகுலையச் செய்துள்ளன. சமீபத்திய தகவல்களின்படி, இந்த டிரோன்கள் தாக்கிய இடங்களின் பட்டியல் இதோ:

1. ஐக்கிய அரபு அமீரகம் (UAE) - மிக மோசமான பாதிப்பு:

அமீரக பாதுகாப்பு அமைச்சகத்தின்படி, இதுவரை 941 டிரோன்கள் ஏவப்பட்டுள்ளன. இதில் 65 டிரோன்கள் இலக்கைத் தாக்கியுள்ளன:

துபாய் (Dubai): புகழ்பெற்ற 'பாம் ஜுமேரா' (Palm Jumeirah) பகுதியில் உள்ள ஃபேர்மாண்ட் ஹோட்டல் அருகே ஒரு டிரோன் விழுந்து வெடித்தது. மேலும், துபாய் சர்வதேச விமான நிலையம் மற்றும் புர்ஜ் அல் அரப் (Burj Al Arab) அருகிலும் சேதங்கள் ஏற்பட்டன.

அபுதாபி (Abu Dhabi): அல் தஃப்ரா (Al Dhafra) மற்றும் அல் மின்ஹாத் (Al Minhad) ஆகிய விமானப்படைத் தளங்கள் இலக்கு வைக்கப்பட்டன. சையத் சர்வதேச விமான நிலையத்திற்கு அருகிலுள்ள குடியிருப்புகளில் இடிபாடுகள் விழுந்து சேதத்தை ஏற்படுத்தின.

பிற இடங்கள்: ஜெபல் அலி துறைமுகம் (Jebel Ali Port) மற்றும் அபுதாபியில் உள்ள ஒரு பெரிய டேட்டா சென்டர் (AWS Data Center) ஆகியவையும் பாதிக்கப்பட்டன.

2. பஹ்ரைன் (Bahrain):

தலைநகர் மனாமா (Manama) பகுதியில் உள்ள ஒரு அடுக்குமாடி குடியிருப்பு கோபுரம் டிரோன் தாக்குதலுக்கு உள்ளானது.

அமெரிக்காவின் 5-வது கடற்படைத் தளம் (US Fifth Fleet) அமைந்துள்ள பகுதியில் ஒரு ரேடார் கோபுரத்தை (Radar dome) ஷாஹித் டிரோன் நேரடியாகத் தாக்கி அழித்த வீடியோ வெளியானது.

3. சவுதி அரேபியா (Saudi Arabia):

ரியாத் நகரில் உள்ள அமெரிக்க தூதரகம் மீது இரண்டு டிரோன்கள் தாக்குதல் நடத்தின.

நாட்டின் மிகப்பெரிய எண்ணெய் சுத்திகரிப்பு நிலையமான ராஸ் தனூரா (Ras Tanura) மீது தாக்குதல் நடத்தப்பட்டதில் அங்கு தீ விபத்து ஏற்பட்டு, உற்பத்தி தற்காலிகமாக நிறுத்தப்பட்டது.

4. பிற நாடுகள் மற்றும் இடங்கள்:

குவைத் (Kuwait): குவைத் விமான நிலையம் மற்றும் அங்குள்ள அமெரிக்க ராணுவத் தளங்கள் மீது தாக்குதல்கள் பதிவாகின.

கத்தார் (Qatar): அல் ரையான் (Al Rayyan) பகுதியில் உள்ள தொழிற்சாலை கிடங்குகள் மற்றும் தொழில்துறை மண்டலங்களில் வெடிப்புகள் நிகழ்ந்தன.

சைப்ரஸ் (Cyprus): அங்குள்ள பிரிட்டிஷ் ராயல் விமானப்படை (RAF Akrotiri) தளம் மீதும் டிரோன் தாக்குதல் நடத்தப்பட்டதாகத் தகவல்கள் தெரிவிக்கின்றன.

ஓமன் மற்றும் ஜோர்டான்: இந்த நாடுகளிலும் உள்ள அமெரிக்க ராணுவ நிலைகள் மற்றும் எல்லைப் பகுதிகளில் டிரோன் ஊடுருவல்கள் கண்டறியப்பட்டுள்ளன.

ஈரான் இந்தத் தாக்குதல்களை ஒரே நேரத்தில் பல முனைகளில் (Multi-front) நடத்தியதால், வளைகுடா நாடுகளின் வான் பாதுகாப்பு அமைப்புகள் பெரும் சவாலைச் சந்தித்தன.

அமெரிக்காவின் 'மாஸ்டர் பிளான்'

வியப்பான விஷயம் என்னவென்றால், ஈரானைத் தாக்க அமெரிக்காவே இப்போது ஈரானின் தொழில்நுட்பத்தைத் திருடி, அதை மேம்படுத்திப் பயன்படுத்தத் தொடங்கியுள்ளது. 'லூகாஸ்' (LUCAS) என்ற பெயரில் அமெரிக்கா உருவாக்கியுள்ள டிரோன்கள், ஈரானின் ஷாஹித்-136-ன் மறுவடிவமே!

மாற்று வழி என்ன?

விலையுயர்ந்த ஏவுகணைகளை வீணாக்குவதற்குப் பதிலாக, உக்ரைன் பாணியில் போர் விமானங்களின் துப்பாக்கிச் சூடு (Cannon fire), ஜி.பி.எஸ் சிக்னல்களைத் துண்டிக்கும் மின்னணுப் போர் (Electronic Warfare) மற்றும் லேசர் கதிர்களைப் பயன்படுத்தி டிரோன்களைச் சுட்டு வீழ்த்தும் 'அயன் பீம்' (Iron Beam) போன்ற தொழில்நுட்பங்களை நோக்கி நாடுகள் நகரத் தொடங்கியுள்ளன.

இருப்பினும், ஈரானிடம் குவித்து வைக்கப்பட்டிருக்கும் ஆயிரக்கணக்கான டிரோன்கள், வரும் நாட்களில் வளைகுடா பிராந்தியத்தில் ஒரு பெரிய 'பொருளாதாரப் போரை' (War of Attrition) உருவாக்கும் என்பதில் சந்தேகமில்லை.