யாருமே இப்படி செய்ததில்லை..சின்ன வெள்ளை காரில் போப் ஆண்டவர் செய்த சம்பவம்..வெலவெலத்த ரஷ்ய அதிகாரிகள்

Updated: Saturday, February 26, 2022, 17:24 [IST]

Subscribe to Oneindia Tamil

வாடிகன் : உக்ரைன் மீதான போரை நிறுத்துமாறு வாடிகனில் உள்ள ரஷ்ய தூதரகத்துக்கு நேரில் சென்ற போப் ஆண்டவர் பிரான்சிஸ் அங்கிருந்த அதிகாரிகளிடம் வலியுறுத்திய சம்பவம் நெகிழ்ச்சியை ஏற்படுத்தியுள்ளது.

உக்ரைன் ராணுவம்

பேச்சுவார்த்தைக்கு தயார் என ஒரு புறம் கூறினாலும் மற்றொருபுறம் உக்ரைன் மீது உக்கிரமான தாக்குதலை நடத்தி வருகிறது ரஷ்ய ராணுவம். மூன்றாவது நாள் போர் வரை நூற்றுக்கணக்கானோர் உயிரிழந்த நிலையில் போர் தொடர்ந்து வருகிறது. மேலும் ரஷ்யாவுக்கும் உக்ரைன் தக்க பதிலடி கொடுத்து வருகிறது. இதன் காரணமாக நிலைமை அங்கு மேலும் தீவிரமாகி வருகிறது.

உலக நாடுகள் உதவி

மணிக்கு மணி பதற்றம் அதிகரித்து வரும் நிலையில், நூற்றுக்கணக்கானோர் அங்கு கொல்லப்பட்டு வருகின்றனர். போர் விதிமுறைகளை மீறி ரஷ்யா குடியிருப்பு பகுதிகளிலும், மக்கள் மீது தாக்குதல் நடத்தி வருவதாக உக்ரைன் குற்றம் சாட்டி வரும் நிலையில், உலக நாடுகள் உக்ரைனுக்கு ஆதரவாக பேசி வருகின்றனர். உக்ரைனுக்கு ஆதரவாக ஸ்வீடன் , பிரான்ஸ் உள்ளிட்ட நாடுகள் ஆயுத உதவி செய்து வருவதாகவும் தகவல் வெளியாகியுள்ளது.

போரை நிறுத்த கோரிக்கை

இந்நிலையில் உக்ரைன் மீதான போரை உடனடியாக நிறுத்த வேண்டுமென கோரிக்கை வலுத்து வரும் நிலையில், போப் ஆண்டவர் போரை நிறுத்த எடுத்துள்ள நடவடிக்கை பலரையும் நெகிழ்ச்சியில் ஏற்படுத்தியுள்ளது. போப் ஆண்டவர் பிரான்சிஸ் ரோமில் உள்ள ரஷிய தூதரகத்துக்கு திடீரென்று நேரில் சென்றார். அப்போது அங்கிருந்த தூதரக அதிகாரிகளை சந்தித்து உக்ரைன் மீது தொடுக்கப்பட்டுள்ள போர் குறித்த தனது கவலையை தெரிவித்ததாகவும், போரை உடனே நிறுத்துமாறு அவர் தூதரக அதிகாரிகளிடம் வேண்டுகோள் விடுத்ததாக தகவல் வெளியாகியுள்ளது.

போப் பிரான்ஸிஸ்

ஆனால் இதுகுறித்த அதிகாரப்பூர்வ தகவல்கள் வெளியாகாத நிலையில், ரஷிய தூதரகத்துக்கு போப் ஆண்டவர் நேரில் சென்றதை வாடிகன் அதிகாரிகள் உறுதி செய்தனர். போப் ஆண்டவர் சிறிய வெள்ளை காரில் ரஷிய தூதரகத்துக்கு சென்று அங்குள்ள அதிகாரிகளை சந்தித்து பேசினார் என்று வாடிகன் தரப்பில் தெரிவிக்கப்பட்டுள்ளது. உக்ரைன் மீதான ரஷ்யாவின் போரை நிறுத்த போப் ஆண்டவர் மேற்கொண்ட முயற்சி நெகிழ்ச்சியை ஏற்படுத்தி இருக்கிறது.