போப் ஆண்டவருக்கு மூளையில் கட்டியா?

வாடிகன்: போப் ஆண்டவருக்கு மூளையில் கட்டியிருப்பதாக இத்தாலிய செய்தித்தாளில் வெளியான செய்தியை வாடிகன் மறுத்துள்ளது.

இத்தாலியைச் சேர்ந்த நாளிதழான கோடிடியானோ நாசியோனேலில் புதன்கிழமை போப் ஆண்டவர் பிரான்சிஸ் பற்றி செய்தி வெளியானது. அந்த நாளிதழில் கூறப்பட்டிருப்பதாவது,

கடந்த சில மாதங்களுக்கு முன்பு ஜப்பானைச் சேர்ந்த நரம்பியல் நிபுணர் ஒருவர் பைசாவில் இருக்கும் தனியார் மருத்துவமனையில் இருந்து வாடிகனுக்கு வரவழைக்கப்பட்டார். அவர் போப் ஆண்டவரை பரிசோதனை செய்துவிட்டு அவருக்கு மூளையில் சிறிய கட்டி இருப்பதாகவும் அதை அறுவை சிகிச்சை செய்யாமலேயே கரைக்க முடியும் என்றும் தெரிவித்துள்ளார்.

இத்தாலியில் பைசா நகர் அருகே உள்ள சான் ரோசோர் டி பார்பாரிசினா மருத்துவமனை ஆலோசகரான டாக்டர் டகனோரி புகுஷிமா தான் அந்த மருத்துவர் ஆவார் என்று அதில் தெரிவிக்கப்பட்டுள்ளது.

நான் போப் ஆண்டவருக்கு மருத்துவ பரிசோதனை செய்ததே இல்லை. இந்த செய்தி முற்றிலும் தவறானது என்று டாக்டர் புகுஷிமா தெரிவித்துள்ளார்.

இந்நிலையில் இது குறித்து வாடிகன் செய்தித் தொடர்பாளர் பெடரிகோ லம்பார்டி கூறுகையில், நான் போப் ஆண்டவரை சந்தித்து பேசினேன். அவர் உடல் நலத்திற்கு ஒன்றும் இல்லை. அவர் நலமாக உள்ளார். அந்த நாளிதழில் வந்த செய்தி மன்னிக்க முடியாதது என்றார்.

English summary

Vatican has denied the report in an Italian newspaper that Pope Francis has brain tumour.