கத்தார் நாளிதழில் வெளியான காமசூத்ரா படம்... பதவியை ராஜினாமா செய்த பொறுப்பாசிரியர்
தோகா: பிரபலமான கத்தார் நாளிதழ் ஒன்றில் செக்ஸ் காட்சிகளை சித்தரிக்கும் காம சூத்ரா படம் வெளியானதை தொடர்ந்து அதன் பொறுப்பாசிரியர் தனது பதவியை ராஜினாமா செய்துள்ளார்.
தவறுக்கு பொறுப்பேற்று பதவியை ராஜினாமா செய்தவரின் பெயர் ஜப்பர் அல்-ஹரிமி என்பதாகும். இவர் கத்தாரில் பிரபலமான அல்-ஷார் என்ற நாளிதழின் தலைமை ஆசிரியர் பணிபுரிந்து வந்தார். நேற்று அந்த நாளிதழின் ஆரோக்கியம் பக்கத்தில் மருதாணி பயன்படுத்துவதில் உள்ள ஆபத்துக்களை பற்றி ஒரு கட்டுரை வெளிவந்தது.
அக்கட்டுரைக்கு வெளியிடப்பட்ட படத்தில் ஒரு பெண் தன் கையில் பிரபல இந்திய செக்ஸ் நூலான காம சூத்ராவில் இருந்து காட்சிகளை சித்தரிக்கிற படங்களை மருதாணியால் பச்சை குத்தியிருந்தார்.
இது அங்கு கடும் சர்ச்சையை ஏற்படுத்தியது. இதனால் கடும் சங்கடத்திற்கு ஆளான ஆசிரியர் ஜப்பர் அல்-ஹரிமி தவறுக்கு பொறுப்பேற்று ஆசிரியர் பதவியில் இருந்து விலகுவதாக கூறி ராஜினாமா கடிதம் அளித்துள்ளார். மேலும் அவர் இது முற்றிலும் திட்டமிடப்படாத தவறு என்றும் தெரிவித்தார். ஆனால் அவரது ராஜினாமாவை நிர்வாகத்தினர் இன்னும் ஏற்கொள்ளவில்லையாம்.