இங்கிலாந்து இளவரசர் வில்லியம்- கேத் மிடில்டன் தம்பதிக்கு பெண் குழந்தை பிறந்தது

லண்டன்: இங்கிலாந்து இளவரசர் வில்லியமின் மனைவியான கேத் மிடில்டனுக்கு இன்று இரண்டாவது பிரசவத்தில் அழகான பெண் குழந்தை பிறந்துள்ளது.

கேத் மிடில்டனுக்கு பிரசவத்துக்கான அறிகுறிகள் இன்று தென்பட்டதையடுத்து, உள்ளூர் நேரப்படி இன்று காலை சுமார் 6 மணியளவில் அவர் மருத்துவமனையில் அனுமதிக்கப்பட்டார்.

ராணி எலிசபெத் குடும்பத்தின் ஆஸ்தான மகப்பேறு மருத்துவரான கை தார்ப்பே பீஸ்டன் தலைமையிலான டாக்டர்கள் குழு கேத் மிடில்டனுக்கு பிரசவம் பார்த்தனர். காலை 11 மணியளவில் பெண் குழந்தை பிறந்த்து என்று கென்சிங்டன் அரண்மனை அதிகாரப்பூர்வமாக அறிவித்துள்ளது.

கேத் மிடில்டனுக்கு பிறக்கப்போகும் குழந்தை ஆணா? பெண்ணா? என்பமு பற்றி மக்களிடையே பலத்த எதிர்பார்ப்பு உருவானது. ஏற்கனவே, ஒரு ஆண் குழந்தைக்கு தாயாகி இருக்கும் கேத் மிடில்டனுக்கு தற்போது இரண்டாவது பிரசவத்தில் இன்று முற்பகலில் அழகான பெண் குழந்தை பிறந்தது. குட்டி இளவரசி பிறந்ததை லண்டன்வாசிகள் கொண்டாடினர்.

கடந்த 182 ஆண்டுகளாக இங்கிலாந்து மன்னர் வம்சத்தில் நேரடி பெண் வாரிசு பிறக்கவில்லை. இரண்டாம் தலைமுறை வாரிசு என்ற வகையிலும் கூட 65 ஆண்டுகளுக்கு முன்னர் இளவரசி அன்னி பிறந்த பின்னர், கடந்த 25 ஆண்டுகளாக இதுவரை வேறு பெண் குழந்தை அரச வம்சத்தில் பிறக்கவில்லை.

இந்த நிலையில் கடந்த 182 ஆண்டுகளில் முதல் முறையாக இங்கிலாந்து மன்னர் வம்சத்தில் நேரடி பெண் வாரிசு தற்போது பிறந்திருக்கிறது. புதிதாக பிறந்த குழந்தை 8 பவுண்ட் 3 அவுன்ஸ் எடை உள்ளதாகவும், குழந்தைக்கான பெயர் விரைவில் சூட்டப்படும் என்றும் அரண்மனை வட்டார தகவல்கள் தெரிவிக்கின்றன. வில்லியம் - கேட் தம்பதிக்கு ஏற்கனவே 1 வயதில் இளவரசர் ஜார்ஜ் உள்ளார் என்பது குறிப்பிடத்தக்கது.

English summary

Latest news on the Royal baby as the Duchess of Cambridge gives birth to a baby girl weighing 8lbs 3oz just two and a half hours after going into hospital