இலங்கை இடைக்கால பிரதமராக ஹரிணி அமரசூரிய பதவியேற்பு- நாடாளுமன்றம் இன்று இரவு கலைப்பு?

கொழும்பு: இலங்கை பிரதமர் தினேஷ் குணவர்த்தன ராஜினாமா செய்த நிலையில் இடைக்காக பிரதமராக ஹரிணி அமரசூரிய இன்று பதவியேற்றுக் கொண்டார். இலங்கை ஜனாதிபதி அனுர குமார திசநாயக்க முன்னிலையில் ஹரிணி அமரசூரிய பதவியேற்றார். மேலும் இலங்கை நாடாளுமன்றம் இன்று இரவு கலைக்கப்படும் என கொழும்பு தகவல்கள் தெரிவிக்கின்றன. இலங்கை நாடாளுமன்றத்துக்கு வரும் டிசம்பர் மாதம் தேர்தல் நடத்தப்படக் கூடிய சாத்தியங்கள் உள்ளதாகவும் கூறப்படுகிறது.

இலங்கை ஜனாதிபதி தேர்தலில் ஜேவிபி எனும் இடதுசாரி, சிங்களப் பேரினவாத கட்சியின் தலைவர அனுர குமார திசநாயக்க வெற்றி பெற்று நேற்று பதவியேற்றார். அனுர குமார திசநாயக்க பதவியேற்பதற்கு சற்று முன்னதாக, பிரதமர் பதவியில் இருந்து தினேஷ் குணவர்த்தன ராஜினாமா செய்தார். இதனையடுத்து தினேஷ் குணவர்த்தன தலைமையிலான அமைச்சரவையும் பதவி விலகியது.

இந்த நிலையில் இலங்கையின் இடைக்கால பிரதமராக ஹரிணி அமரசூரிய இன்று ஜனாதிபதி அனுர குமார திசநாயக்க முன்னிலையில் பதவியேற்றார். மேலும் ஜனாதிபதி தேர்தல் பிரசாரத்தின் போது அளித்த வாக்குறுதியின் படி இன்று இரவு இலங்கை நாடாளுமன்றத்தை கலைத்து உத்தரவை பிறப்பிக்க இருக்கிறார் ஜனாதிபதி அனுர குமார திசநாயக்க. இலங்கை நாடாளுமன்றத்துக்கு வரும் டிசம்பர் மாதம் பொதுத் தேர்தல் நடைபெறும் எனவும் கொழும்பு தகவல்கள் தெரிவிக்கின்றன.

இலங்கையின் 9-வது நிறைவேற்று ஜனாதிபதியாக அனுர குமார திசநாயக்க பொறுப்பேற்றுக் கொண்டார். அதாவது இலங்கையில் பிரதமரை விட ஜனாதிபதிக்கே அதிக அதிகாரம் என்பதால் 'நிறைவேற்று' ஜனாதிபதி என குறிப்பிடப்படுகிறது.

ஆனால் ஜனாதிபதி தேர்தலின் போது ஜேவிபி தரப்பில், நிறைவேற்று அதிகாரம் கொண்ட ஜனாதிபதி ஆட்சி முறை ஒழிக்கப்படும் என வாக்குறுதி அளிக்கப்பட்டது. இதனால் டிசம்பர் மாதம் பொதுத் தேர்தல் முடிவடைந்த பின்னர் அமையும் புதிய நாடாளுமன்றத்தில் முதல் மசோதாவாக இலங்கையில் நிறைவேற்று அதிகாரம் கொண்ட ஜனாதிபதி ஆட்சி முறையை கைவிடுவதற்கான மசோதா தாக்கல் செய்யப்படலாம் எனவும் கூறப்படுகிறது. அதேநேரத்தில் அப்படி ஒரு மசோதா நிறைவேறினாலும் அடுத்த ஜனாதிபதி தேர்தல் முதலே இது நடைமுறைக்கு வரும் சாத்தியம் உள்ளதாகவும் கூறப்படுகிறது.

English summary

Srilankan Parliament will be dissolved tonight and Election will be held by December.