அதிமுக தேர்தல் அறிக்கை அனைத்து வாக்குறுதிகளுக்கும் 'தாயாக' திகழ்கிறது - தி ஐரிஷ் டைம்ஸ் பத்திரிகை
டப்ளின்: தமிழக சட்டசபை தேர்தலையொட்டி அதிமுக சார்பில் வெளியிடப்பட்டுள்ள தேர்தல் அறிக்கை உலக அனைத்து வாக்குறுதிகளுக்கும் தாயாக திகழ்கிறது என்று தி ஐரிஷ் டைம்ஸ் என்ற நாளிதழ் விமர்சித்துள்ளது.
தமிழக சட்டசபை தேர்தலுக்கான வாக்குப்பதிவு நாளை நடைபெறவுள்ளது. இந்த தேர்தலில் ஆளும் அதிமுக ஆட்சியை தக்க வைத்துக் கொள்ளுமா அல்லது திமுக கூட்டணி ஆட்சியை கைப்பற்றுமா என்ற பலத்த எதிர்பார்ப்பு எழுந்துள்ளது.
மேலும் முன் எப்போதும் இல்லாத அளவிற்கு தமிழக தேர்தல் களம் ஆறு முனை போட்டியை சந்திக்கிறது. இதில் யார் வெற்றி பெற்று ஆட்சியை கைப்பற்றுவார்கள் என்ற கேள்விக்கு விடை மே 19 ஆம் தேதி தெரியவரும்.
இந்நிலையில் தி ஐரிஷ் டைம்ஸ் என்ற அயர்லாந்து பத்திரிகை, அதிமுகவின் தேர்தல் அறிக்கை குறித்து, அனைத்து தேர்தல் வாக்குறுதிகளுக்கும் தாய் என கூறியுள்ளது. மேலும், இதுபோன்று இலவசங்களை வாரி இறைக்கும் ஒரு கட்சியை அயர்லாந்தில் பார்க்க முடியுமா என்றும் அப்பத்திரிகை கேள்வி எழுப்பியுள்ளது.
இலவச செல்போன்கள், தாலிக்கு 8 கிராம் தங்கம் இலவசம், பெண்கள் இரு சக்கர வாகனங்களை வாங்க 50 சதவீதம் மானியம் என பல்வேறு அறிவிப்புகள் அதிமுகவின் தேர்தல் அறிக்கையில் குறிப்பிடப்பட்டுள்ளதை அப்பத்திரிகை சுட்டிக்காட்டியுள்ளது.
பள்ளி மாணவர்களுக்கு லேப்டாப் வழங்கப்படும் என திமுக அறிவித்துள்ள நிலையில், அதற்கு போட்டியாக பல்வேறு அறிவிப்புகளை அதிமுக வெளியிட்டுள்ளதாக ஐரிஷ் டைம்ஸ் தெரிவித்துள்ளது.