என்னா ஒரு சோம்பேறித்தனம்.. இந்த "பக்கி"க்கு நாம கேர்ள் பிரண்ட் தேடிக் கொடுக்கனுமாம்... !
அலபாமா: அமெரி்க்கர்களுக்கு மூளை சற்று சதுரமாக இருக்கும் போல.. விதம் விதமாக வித்தியாசமாக, வில்லங்கமாகத்தான் யோசிக்கிறார்கள். அலபாமாவைச் சேர்ந்த ஒருவர் தனக்கேற்ற காதலியைத் தேடித் தரும் வேலையை அவுட்சோர்சிங்குக்கு விட்டு விட்டு ஹாயாக இருக்கிறார். சரியான ஜோடியைத் தேடித் தருவோருக்கு இவர் பத்தாயிரம் டாலர் பரிசாக தருவாராம்.
கிட்டத்தட்ட கல்யாணத்திற்குப் பெண் தேடுவது போலத் தேடி வருகிறார் இந்த பார்ட்டி.. தம்பியின் பெயர் ரென் லூ யூ. 29 வயதகிறது. அலபாமாவின் பிர்மிங்காம் நகரில் வசித்து வருகிறார்.
இவராக சொந்தமாக சில காதல் முயற்சியில் ஈடுபட்டுப் பார்த்தார். ஆனால் ஒன்றும் சரிப்பட்டு வரவில்லை. 30 "பிள்ளை"களைப் பார்த்தும் கூட, பழகியும் கூட, யாரும் இவருக்கு செட் ஆகவில்லையாம். எல்லாம் புட்டுக்கிட்டதாம். பார்த்தார், டக்கென்று ஒரு வெப்சைட்டை (dateren.com,) திறந்தார். விளம்பரம் ஒன்றை அதில் போட்டார்.
எனக்கேற்ற நல்ல, அழகிய, மனதுக்கேற்ற, பழகுவதற்கு இனிமையான, பரந்த மனப்பான்மையுடன் கூடிய (நல்லவேளை எங்க அம்மாவுக்குப் பிடித்தார் போன்ற என்று சொல்லாமல் விட்டார்) பெண்ணைப் பார்த்துத் தருவோருக்கு 10,000 டாலர் பரிசாக தரப்படும் என்று போட்டு விட்டார்.
சமீபத்தில்தான் இவர் ஹார்வர்ட் பிசினஸ் பள்ளியில் பட்டம் முடித்து வெளியே வந்தாராம். தற்போது ஒரு பங்கு நிறுவனத்தில் வேலையில் சேர்ந்துள்ளார்.
இவர் திறந்துள்ள இணையதளத்தில் தங்களுக்குத் தெரிந்த பெண்களின் புரபைல்கள், புகைப்படங்கள், வீடியோக்கள், இன்ன பிற தகவல்களை யார் வேண்டுமானாலும் போட்டு விடலாம். யூவுக்குப் பிடித்தால், 6 மாதத்திற்கு மேலும் அந்தப் பெண்ணுடன் வெற்றிகரமாக டேட்டிங் நீடித்தால், ரெக்கமண்ட் செய்த நபருக்கு 10,000 டாலர் பரிசாக வந்து சேருமாம். அதேசமயம், தாங்களாகவே முன்வந்து விண்ணப்பிக்கும் பெண்களுக்கு இந்தப் பரிசு கிடையாதாம்.
மிஸ்டர் லூ.. எதுக்கும் முகத்தை கொஞ்சம் நல்லா கண்ணாடில பார்த்துக்கங்க.. 30 பேரைப் பார்த்தும் தேறாத காதல் இனியாவது தேடி வரப் போகுது...!