வெடிக்கும் குண்டுகள்.. "தனிமையில்" உக்ரைன்.. வானில் ஆங்காங்கே மஞ்சள் நிறம்.. வெளியான புகைப்படம்

Published: Thursday, February 24, 2022, 13:50 [IST]

Subscribe to Oneindia Tamil

கிவ்: உக்ரைன் மீது ரஷ்யா போர் தொடுத்து வரும் நிலையில் இணையதளத்தில் அங்கு நடக்கும் காட்சிகள் வெளியாகியுள்ளன.

உக்ரைன் மீது ராணுவ நடவடிக்கையை எடுக்குமாறு ரஷ்ய அதிபர் விளாதிமிர் புதின் உத்தரவிட்டதன் பேரில் இன்று அதிகாலை முதல் ரஷ்ய படைகள் உக்ரைனுக்குள் நுழைந்து தாக்குதல்களை நடத்தி வருகிறார்கள்.

உக்ரைனின் விமான தளங்கள், ராணுவ தளங்கள் மீது தாக்குதல் நடத்தி வருவதால் தங்கள் நாட்டை சேர்ந்த நூற்றுக்கணக்கான ராணுவ வீரர்கள் உயிரிழந்துவிட்டதாக உக்ரைன் அரசு தெரிவித்துள்ளது.

உக்ரைன்

உக்ரைனின் முக்கிய நகரங்களில் இருந்து குண்டு வெடிக்கும் சப்தம் கேட்பதாக தகவல்கள் வெளியாகியுள்ளன. இந்த போருக்கு குறுக்கே யார் வந்தாலும் கடுமையான பதிலடி கொடுக்கப்படும் என ரஷ்ய அதிபர் விளாதிமிர் புதின் எச்சரிக்கை விடுத்துள்ளார். இந்த போரால் உலக பொருளாதாரம் கடுமையாக பாதிக்கப்படும் என்ற கவலை எழுந்துள்ளது.

பொருளாதார தடை

இந்த நிலையில் உக்ரைன் மீது ரஷ்யா போர் தொடுப்பதால் ரஷ்யா மீது அமெரிக்கா உள்ளிட்ட நாடுகள் பொருளாதார தடையை விதித்துள்ளன. கடந்த சில நாட்களாகவே உக்ரைனில் உள்ள தங்கள் நாட்டினரை தாயகம் திரும்ப அழைப்பு விடுத்திருந்தது. அது போல் கிவ்வில் உள்ள அந்தந்த நாட்டு தூதரகத்தில் மாணவர்கள் தங்கியுள்ள இடம், தொடர்பு எண் குறித்து கேட்டு வாங்கிக் கொண்டது.

இந்தியா

இந்த நிலையில் இந்தியாவிலிருந்து உக்ரைன் சென்ற விமானம் ரஷ்ய போரை அறிந்தவுடன் மீண்டும் திரும்பியது. உக்ரைன் வான் எல்லையில் ரஷ்ய நாட்டு போர் விமானங்கள் பறந்து வருவதால் உக்ரைனில் விமான போக்குவரத்து நிறுத்தப்பட்டது. இதனால் உக்ரைனில் உள்ள கிவ் உள்ளிட்ட விமான நிலையங்கள் வெறிச்சோடி காணப்படுகின்றன.

செயற்கைகோள் படம்

இதுகுறித்து ஒரு செயற்கைகோள் படம் வெளியாகியுள்ளது. அதில் பின்லாந்து, பெலாரஸ், லித்துவானியா, மோல்டோவா, எஸ்டானியா, ஸ்லோவாகியா உள்ளிட்ட பகுதிகளில் மஞ்சள் நிறத்தில் விமான போக்குவரத்து குறியிட்டு காட்டப்பட்டுள்ளது. அது போல் உக்ரைன் தலைநகர் கிவ்வை சுற்றி விமான போக்குவரத்து இல்லை. இந்த புகைப்படத்தின் மூலம் உக்ரைனில் சிக்கித் தவித்து வருவோர் அருகில் உள்ள விமான நிலையங்களுக்கு சென்று அங்கிருந்து தங்கள் தாய் நாட்டிற்கு திரும்ப ஏதுவாக இருக்கும் என்பதால் சமூகவலைதளங்களில் பரவி வருகிறது.

Published On February 24, 2022