அமெரிக்க அதிபர் ஜோபிடனுடன் உக்ரைன் அதிபர் ஜெலன்ஸ்கி பேச்சுவார்த்தை.. என்ன பேசினார்?

கீவ்: அமெரிக்க அதிபர் ஜோ பிடனுடன் உக்ரைன் அதிபர் வோலோடிமிர் ஜெலன்ஸ்கி தொலைபேசியில் பேசினார்.

உக்ரைனில் கடந்த இரு வாரங்களுக்கு முன்னர் தொடங்கப்பட்ட போர் இன்று 11 ஆவது நாளாக தொடர்ந்து நீடித்து வருகிறது. நேற்றைய தினம் சில மணி நேரங்களுக்கு மீட்பு பணிகளுக்காக மனிதாபிமான அடிப்படையில் போர் நிறுத்தப்பட்டது.

இதையடுத்து ரஷ்யா மீண்டும் தனது தாக்குதலை வெறிக் கொண்டு நடத்தி வருகிறது. உக்ரைன் நாட்டின் வான்வெளியில் விமானங்கள் பறக்க தடை செய்யப்பட்ட பகுதியாக அறிவிக்கக் கோரி உக்ரைன் அதிபர் ஜெலன்ஸ்கி கோரிக்கை விடுத்திருந்தார்.

நேட்டோ மறுப்பு

அதை நேட்டோ ஏற்க மறுத்துவிட்டது. உக்ரைனால் தாக்குப் பிடிக்க முடியாவிட்டால் பிற ஐரோப்பிய நாடுகளாலும் தாக்குப்பிடிக்க முடியாது. உக்ரைன் மக்கள் தொடர்ந்து ரஷ்யாவுக்கு எதிராக போராடுவார்கள் என ஜெலன்ஸ்கி கூறியிருந்தார். அவ்வப்போது பொதுவெளியில் டிஜிட்டல் திரையில் தோன்றி மக்களுக்கு நம்பிக்கையை கொடுத்து வருகிறார்.

போர் நிறுத்த ஒப்பந்தம்

உக்ரைனில் வோல்னோவாக்கா, மரியபோல் ஆகிய நகரங்களில் போரை நிறுத்த ஒப்பந்தம் போட முயற்சிகள் மேற்கொள்ளப்படுகின்றன. ரஷ்யாவின் நவீன ரக பீரங்கிகள், துப்பாக்கிகளுக்கு இணையாக உக்ரைனும் தாக்குதல் நடத்தி வருகிறது. அமெரிக்கா கொடுத்த ஆயுதமான ஜாவ்லின் கொண்டு ரஷ்ய பீரங்கிகளை உக்ரைன் ராணுவத்தினர் வீழ்த்தி வருகிறார்கள்.

ஜாவ்லின்

தொடர்ந்து அமெரிக்கா உள்ளிட்ட நாடுகள் ஆயுதங்களை வழங்கி வருகின்றன. இந்த நிலையில் அமெரிக்க அதிபர் ஜோ பிடனுடன் உக்ரைன் அதிபர் ஜெலன்ஸ்கி தொலைபேசியில் பேசியுள்ளார். இதுகுறித்து ஜெலன்ஸ்கி தனது ட்விட்டர் பக்கத்தில் கூறியுள்ளார். அதில் அவர் கூறுகையில் அமெரிக்க அதிபர் ஜோ பிடனுடன் பேச்சுவார்த்தை நடத்தினேன்.

அமெரிக்காவின் ஆயுத உதவி

அவரிடம் பாதுகாப்பு, உக்ரைனுக்கான நிதியுதவி, ரஷ்யாவுக்கு எதிராக தொடர் தடைகள் குறித்து பேச்சுவார்த்தை நடத்தினேன் என ட்வீட்டில் தெரிவித்துள்ளார். கடந்த மாதம் 24 ஆம் தேதி 350 டாலர் மதிப்பிலான ஆயுதங்களை அமெரிக்கா உக்ரைனுக்கு அனுப்பியுள்ளது. இது அமெரிக்க வரலாற்றில் மிக அதிகமான ஆயுத உதவியாகும். இந்த ட்வீட் போடுவதற்கு சில மணி நேரத்திற்கு முன்னர் அமெரிக்க எம்பிக்களுடன் வீடியோ காலில் பேசிய அதிபர் ஜெலன்ஸ்கி ரஷ்ய எண்ணெய் இறக்குமதிக்கு தடை விதிக்க வேண்டும் என கேட்டுக் கொண்டார்.

English summary

Ukraine's President Volodymyr Zelensky talked to US President Joe Biden about "the issues of security, financial support for Ukraine and the continuation of sanctions against Russia," as per his tweet.