நடுவானில் மயங்கிய துணை விமானி: அவசரமாக தரையிறக்கப்பட்ட யுனைடெட் ஏர்லைன்ஸ் விமானம்

ஹூஸ்டன்: அமெரிக்காவில் ஹூஸ்டனில் இருந்து சான் பிரான்சிஸ்கோவுக்கு சென்ற யுனைடெட் ஏர்லைன்ஸ் விமானத்தின் துணை விமானி மயக்கம் அடைந்ததை அடுத்து விமானம் அவசரமாக தரையிறக்கப்பட்டது.

அமெரிக்காவின் டெக்சாஸ் மாநிலத்தில் உள்ள ஹூஸ்டனில் இருந்து யுனைடெட் ஏர்லைன்ஸ் விமானம் 1614 கலிபோர்னியாவில் உள்ள சான் பிரான்சிஸ்கோ நகருக்கு செவ்வாய்க்கிழமை காலை பயணிகளுடன் கிளம்பியது. விமானம் நடுவானில் செல்கையில் துணை விமானி சுயநினைவை இழந்தார்.

இதையடுத்து விமானி விமானத்தை சான் பிரன்சிஸ்கோவுக்கு பதில் நியூமெக்சிகோ மாநிலத்தில் உள்ள அல்புகர்கு நகரில் இருக்கும் சர்வதேச விமான நிலையத்தில் தரையிறக்கினார். விமானம் தரையிறக்கப்பட்ட பிறகு துணை விமானிக்கு நினைவு திரும்பியது. இதையடுத்து அவராகவே விமானத்தில் இருந்து இறங்கினார்.

விமானத்தில் இருந்து இறங்கிய துணை விமானி மருத்துவமனையில் அனுமதிக்கப்பட்டார். முன்னதாக கடந்த ஞாயிற்றுக்கிழமை அரிசோனா மாநிலத்தில் இருக்கும் ஃபீனிக்ஸ் நகரில் இருந்து 147 பயணிகளுடன் மசாசுசெட்ஸ் மாநிலத்தில் உள்ள பாஸ்டன் நகருக்கு சென்ற விமானத்தின் கேப்டன் திடீர் என்று மாரடைப்பால் மரணம் அடைந்தார்.

இதையடுத்து துணை விமானி விமானத்தை பத்திரமாக தரையிறக்கினார் என்பது குறிப்பிடத்தக்கது.

English summary

A United Airlines flight from Houston to San Francisco had to be diverted to Albuquerque, after the co-pilot lost consciousness mid-flight.