இந்தியாவுடனான நட்புறவு சீனா, பாகிஸ்தானுக்கு எதிரானது அல்ல: அமெரிக்கா

வாஷிங்டன்: இந்தியாவுடனான நட்புறவு என்பது சீனா, பாகிஸ்தானுக்கு எதிரானது அல்ல என்று அமெரிக்கா விளக்கம் அளித்துள்ளது.

இது தொடர்பாக வெள்ளை மாளிகையின் தெற்காசிய விவகாரங்களுக்கான மூத்த இயக்குநர் பில் ரீனெர் கூறியதாவது:

இந்தியா- அமெரிக்கா நட்புறவு முயற்சிகள் என்பது அடிப்படையில் எந்த ஒரு நாட்டுக்கும் எதிரானது அல்ல. சீனாவை கவனத்தில் கொண்டு இருநாடுகளும் இணைந்து செயல்படுவதாக கூறப்படுவதும் சரியானது அல்ல.

இந்தியாவும் அமெரிக்காவும் இணைந்து செயல்படுவது என்பது இருநாட்டு நலன்களின் அடிப்படையிலானது. தெற்காசிய பிராந்தியத்தில் நாடுகளின் பொருளாதார வளர்ச்சிக்கு அமெரிக்கா பங்களிப்பு செய்கிறது.

ஏற்கெனவே உள்ள் சர்வதேச நடைமுறைகளைப் பின்பற்றியே இருநாடுகளும் இணைந்து செயல்பட்டு வருகின்றன. மேலும் இந்த பிராந்தியத்தில் உள்ள பாகிஸ்தான், ஆப்கானிஸ்தானுடன் தொடர்ச்சியாக பேச்சுவார்த்தைகளை நாங்கள் நடத்தியும் வருகிறோம்.

இந்தியா- அமெரிக்கா இடையேயான அணுசக்தி ஒப்பந்தம் என்பது பல ஆண்டுகளுக்கு முன்பு போடப்பட்டது. அது தொடர்பான பாகிஸ்தானின் விமர்சனம் ஏற்புடையது அல்ல. ஏற்கெனவே உள்ள ஒரு ஒப்பந்தத்தை நடைமுறைப்படுத்துவதற்கான ஒப்பந்தம்தான் தற்போது போடப்பட்டிருக்கிறது. அனைத்து நாடுகளுடனும் அமெரிக்கா நட்புறடன் இருக்கவே விரும்புகிறது.

இவ்வாறு பில் ரீனெர் கூறினார்.

அமெரிக்கா அதிபர் ஒபாமா இந்தியா வருகை தந்த போது, அமெரிக்காவின் சதி வலையில் இந்தியா வீழ்ந்துவிடக் கூடாது என்று சீனா பகிரங்கமாக எச்சரித்திருந்தது. மேலும் பாகிஸ்தானும் இந்தியா- அமெரிக்கா இடையேயான அணுசக்தி ஒப்பந்தத்தை விமர்சித்திருந்தது குறிப்பிடத்தக்கது.

English summary

A senior US official has denied suggestions that the US-India partnership was intended as a counterweight to China, saying its sole intent was "to build India up" working on common core values. "I would fundamentally point to the fact that this is a US-India effort and it's not necessarily to counterweight anyone," IANS quoted Phil Reiner, White House's senior director for South Asian Affairs, as telling foreign media at a round table on Tuesday on Obama's India trip.