ராஃபாவில் சிக்கியுள்ள லட்சக்கணக்கான பாலஸ்தீனர்கள்! போரை முன்னெடுக்கும் இஸ்ரேல்.. அமெரிக்கா எதிர்ப்பு

காசா: பாலஸ்தீனம் மீது இஸ்ரேல் தனது போரை தீவிரப்படுத்தியுள்ளது. இதற்கு கடும் எதிர்ப்பு எழுந்து வரும் நிலையில், ராஃபா எல்லையில் தாக்குதல் நடத்த இஸ்ரேல் தீவிரமாக தயாராகி வருகிறது. இஸ்ரேலின் இந்த நடவடிக்கைக்கு அமெரிக்கா எதிர்ப்பு தெரிவித்துள்ளது.

காசா மீது இஸ்ரேல் நடத்தி வரும் தாக்குதல் சமீபத்தில் உச்சத்தைத் தொட்டிருக்கிறது. சில நாட்களுக்கு முன்னர் ஐ நா பணியாளர்களை ஏற்றிச் சென்ற வாகனம் மீது இஸ்ரேல் வான்வழி தாக்குதலை நடத்தியது. இதில் 7 பேர் கொல்லப்பட்டனர். எனவே உடனடியாக போர் நிறுத்தத்தை கொண்டு வரவேண்டும் என்று உலக நாடுகள் தீவிரமாக வலியுறுத்த தொடங்கின. இது நாள் வரை இஸ்ரேலுக்கு ஆதரவாக நின்ற அமெரிக்கா கூட, உடனடியாக போரை நிறுத்த வேண்டும் என்று கேட்டுக்கொண்டது.

ஆனால், போர் தற்போதுவரை நிற்கவில்லை. 34,500க்கும் அதிகமானவர்கள் இந்த போரில் உயிரிழந்துள்ளனர். இதில், பாதிக்கும் மேற்பட்டவர்கள் பெண்களும், குழந்தைகளும்தான். மட்டுமல்லாது போர் காரணமாக காசாவுக்குள் நிவாரண பொருட்கள் எதுவும் வரவில்லை. இதனால் உணவுக்கும், குடிநீருக்கும் பஞ்சம் ஏற்பட்டிருக்கிறது. நோயாளிகள், கர்ப்பிணிகள், முதியவர்கள் உணவு கிடைக்காமல் அடுத்தடுத்து உயிரிழந்தனர். தொற்று நோய் பாதிப்புகளும் தீவிரமடைந்துள்ளன.

இதற்கிடையில் போர் நிறுத்தம் கோரி ஐ நா பாதுகாப்பு கவுன்சிலில் பாலஸ்தீன ஆதரவு நாடுகள் கொண்டு வரும் தீர்மானங்களை, அமெரிக்காவும், பிரிட்டனும் தனது வீட்டோ அதிகாரத்தை பயன்படுத்தி ரத்து செய்து வருகிறது. எனவே இந்த போர் மத்திய கிழக்கு முழுவதும் பரவும் அபாயம் எழுந்திருக்கிறது.

மறுபுறம் இந்த போரை எதிர்த்தும், போரில் இஸ்ரேலுக்கு ஆதரவான அமெரிக்காவின் நிலைப்பாட்டை எதிர்த்தும் அமெரிக்க பல்கலைக்கழகங்களில் போராட்டங்கள் சூடுபிடித்துள்ளன. அமெரிக்காவில் மட்டும் 50க்கும் அதிகமான பல்கலைக்கழகங்களில் மாணவர்கள் இந்த போராட்டத்தை நடத்தி வருகின்றனர். போராடும் மாணவர்கள் மற்றும் பேராசிரியர்களை அந்நாட்டு காவால்துறை கைது செய்து வருகிறது. தற்போது வரை 900க்கும் அதிகமானோர் கைதாகியுள்ளனர்.

மாணவர் போராட்டம் லண்டன், பாரிஸ் என ஐரோப்பிய நாடுகளுக்கும் பரவ தொடங்கியுள்ளது. சூழல் இப்படி இருக்கையில் 'சர்வதேச குற்றவியல் நீதிமன்றத்தால்' (ICC) போர் குற்றத்திற்காக இஸ்ரேல் பிரதமர் நெதன்யாகு விரைவில் கைது செய்யப்படுவார் என்று தகவல்கள் வெளியாகியுள்ளன.

இந்நிலையில் காசாவுக்கும், எகிப்துக்கும் எல்லையாக உள்ள ராஃபா பகுதியை தாக்க இஸ்ரேல் தயாராகி வருகிறது. எனவே ஏராளமான மக்கள் அங்கிருந்து வெளியேற தொடங்கியுள்ளனர். காசா மீது தாக்குதல் நடத்தப்பட்ட போது பாலஸ்தீன மக்கள் ராஃபா நோக்கிதான் நகர்ந்தார்கள். ஆனால் இப்போது ராஃபாவிலும் தாக்குதல் நடத்தப்படும் என அறிவித்திருப்பதால் மக்கள் எங்கு செல்வது என்று தெரியாமல் தவித்து வருகின்றனர்.

இந்த தாக்குதல் திட்டத்திற்கு அமெரிக்காவும் எதிர்ப்பு தெரிவித்திருக்கிறது. அமெரிக்க வெளியுறவுத்துறை செயலாளர் ஆன்டனி பிளிங்கன் கூறுகையில், "இஸ்ரேல் ராணுவம் ராஃபாவுக்குள் செல்வது என்பது அமெரிக்கா-இஸ்ரேல் அரசுகளுக்கு இடையே எதிர்மறை விளைவுகளை ஏற்படுத்தும்" என்று கூறியுள்ளார். இருப்பினும் இஸ்ரேல் தனது நடவடிக்கையில் உறுதியாக இருக்கிறது.

ராஃபா எல்லையில் 15 லட்சம் மக்கள் வரை இருக்கின்றனர். இதில் தற்போது 1 லட்சம் பேர்தான் வெளியேற தொடங்கியுள்ளனர் என்பது குறிப்பிடத்தக்கது.

English summary

Israel has intensified its war on Palestine. Amid strong opposition to this, Israel is actively preparing to attack the Rafah border. The US has protested against this move by Israel.