ஏகோபித்த ஆதரவுடன் அமெரிக்காவின் துணை அமைச்சராகும் முதல் இந்தியப்பெண்

வாஷிங்டன்: இதுவரை அமெரிக்காவை பூர்வீகமாகக் கொண்டவர்கள் மட்டுமே வகித்து வந்த அமெரிக்காவின் துணை அமைச்சர் பதவிக்கு முதல் முறையாக இந்திய வம்சாவளியைச் சேர்ந்த பெண் ஒருவர் தேர்ந்தெடுக்கப் பட்டுள்ளார்.

கடந்த ஜூலை மாதம், தெற்கு, மத்திய ஆசியப் பிராந்தியத்துக்கான அமெரிக்காவின் துணை மந்திரி பதவிக்கு, இந்திய வம்சாவளியை சேர்ந்த நிஷா தேசாய் பிஸ்வால் என்ற பெண்ணை அதிபர் ஒபாமா பரிந்துரை செய்தார்.

இதுகுறித்து செனட் சபையின் வெளியுறவு கமிட்டியில் விவாதிக்கப்பட்டது. அப்போது நிஷாவின் திறமை குறித்து ஆளுங்கட்சி மற்றும் எதிர்க்கட்சி உறுப்பினர்கள் நம்பிக்கை தெரிவித்ததால், ஒருமித்த ஆதரவுடன் தெற்கு, மத்திய ஆசியப் பிராந்தியத்துக்கான துணை அமைச்சராக நிஷா நியமிக்கப்படுவதற்கு செனட் சபை ஒப்புதல் அளித்தது. இதனைத் தொடர்ந்து, விரைவில் நிஷா அதிகாரப்பூர்வமாக பதவியேற்பார் எனத் தெரிகிறது.

தற்போது சர்வதேச வளர்ச்சிக்கான அமெரிக்க நிறுவனத்தில், ஆசிய பிரிவுக்கான உதவி நிர்வாகியாக நிஷா தேசாய் பிஸ்வால் பணியாற்றி வருகிறார் என்பது குறிப்பிடத்தக்கது.

English summary

The US Senate has confirmed Indian-American woman administrator Nisha Desai Biswal as the assistant secretary of state for South and Central Asia, making her the first person from the community to hold the top diplomatic position.