வாக்குப்பதிவு இயந்திரத்தில் பழுது, ஆள் மாறாட்டம், நீண்ட கியூ.. அமெரிக்க தேர்தலிலும் அதிருப்தி
வாஷிங்டன்: அமெரிக்க அதிபர் தேர்தலிலும், இந்திய தேர்தலை போல ஆங்காங்கு ஆள் மாறாட்ட புகார்களும், வாக்குப்பதிவு இயந்திர பழுது புகார்களும் எழுந்துள்ளன.
இங்காம் கன்ட்ரி நகரில், பர்தா அணிந்திருந்த இரு பெண்கள் ஆள் மாறாட்டம் மூலம் வாக்குப்பதிவு செய்ய முயன்றது கண்டுபிடிக்கப்பட்டு தடுக்கப்பட்டது. அதேபோல நீண்ட கியூவில் நிற்க வேண்டிய கட்டாயம், வாக்குப்பதிவு இயந்திர பழுது போன்ற புகார்களும் தொலைபேசி மூலம் தேர்தல் அதிகாரிகளுக்கு கிடைக்கப்பெற்றுள்ளது.
புளோரிடா, பெல்சில்வேனியா பகுதிகளில் புகார்கள் அதிகமாக வந்துள்ளன. நியூஜெர்சியில் ஒரு வாக்காளர், தான் 3 மணி நேரம் காத்திருந்ததாக புகார் கூறியுள்ளார். வாக்குப்பதிவு இயந்திரங்கள் குறைந்த அளவில் நிறுவப்பட்டிருந்தது இந்த தாமதத்திற்கு காரணமாம்.
பிலடெல்பியாவில் அதிகப்படியான புகார்கள் வந்தபோதும், அதில் பெரும்பாலானவை நிரூபிக்கப்படவில்லை என்று அதிகாரிகள் தெரிவித்தனர்.