பிரான்ஸ் அதிபர் முகத்தில் "பளார்" விட்ட மனைவி.. வீடியோவை வைத்து விளையாடும் ரஷ்யா! உண்மையில் நடந்தது இதுதான்

பாரீஸ்: வியட்நாமில் பிரான்ஸ் அதிபர் மக்ரோனை அவரது மனைவி அறைந்ததாகவும் இருவருக்கும் இடையே மோதல் இருப்பதாகவும் சொல்லி இணையத்தில் பல்வேறு தகவல்கள் பரப்பப்பட்டன. இதற்கிடையே இது தொடர்பாக அவரே முக்கியமான சில கருத்துகளைத் தெரிவித்திருந்தார். மேலும், பிரான்ஸ் அதிபர் குறித்து இதுபோன்ற தகவல்கள் பரப்பப்படுவது ஏன்.. இதன் பின்னணியில் யார் என்பது குறித்தும் அந்நாட்டு அதிபர் மாளிகை சில முக்கிய கருத்துக்களை தெரிவித்துள்ளது.

இப்போது பிரான்ஸ் நாட்டின் அதிபராக இம்மானுவேல் மக்ரோன் இருக்கிறார். கடந்த 2017ம் ஆண்டு முதலே இவர் தான் பிரான்ஸ் நாட்டின் அதிபராக இருந்து வருகிறார். தீவிர வலதுசாரியான இவர், அவ்வப்போது சர்ச்சைகளில் சிக்குவதையும் வழக்கமாகக் கொண்டிருக்கிறார். இதற்கிடையே நேற்று முதல் இவரது வீடியோ ஒன்று இணையத்தில் டிரெண்டானது.

பிரான்ஸ் அதிபர் மக்ரோன்

இப்போது மக்ரோன் அரசு முறை பயணமாக வியட்நாம் சென்றுள்ளார். அங்கு விமானத்தில் இருந்து இறங்கும் முன்பு அவரது மனைவி அவரை அறைவது போன்ற வீடியோ இணையத்தில் டிரெண்டானது. அதாவது அவர் கீழே இறங்க ரெடியாவதற்குள் விமானத்தின் கதவு திறந்துவிட்டது. அப்போது அவரை மனைவி அறைவது போன்ற காட்சிகள் வெளியானது. அதன் பிறகு அவர் அப்படியே சமாளித்துக் கொண்டு விமானத்தில் இருந்து கீழே இறங்குவது போல அந்த காட்சிகள் இருந்தது.

நெட்டிசன்கள்

இந்த வீடியோ இணையத்தில் தீயாக பரவியது. பலரும் பிரான்ஸ் அதிபர் மாக்ரோனுக்கும் அவரது மனைவிக்கும் இடையே மோதல் இருப்பதாகவும் இதன் காரணமாகவே அவர் அறையப்பட்டதாக எல்லாம் தகவல்கள் பரப்பின. மேலும், அவரது மனைவியை அந்த வீடியோவில் பார்க்க முடியவில்லை. இருந்தாலும் அவர் கோபமாகவே அறைந்ததாகக் கூட சிலர் குறிப்பிட்டனர். இதனால் இந்தச் சம்பவம் பேசுபொருள் ஆனது. இதற்கிடையே பிரான்ஸ் அதிபர் மாக்ரோன் இது தொடர்பாக விளக்கமளித்துள்ளார்.

பிரான்ஸ் அதிபர் விளக்கம்

இருவரும் ஜோக் செய்து விளையாடிக் கொண்டு இருந்ததாகவும் அது இவ்வளவு பெரிய விஷயமாகும் என நினைக்கவில்லை என்றும் குறிப்பிட்டிருந்தார். இது தொடர்பாக அவர் மேலும் கூறுகையில், "நானும் என் மனைவியும் சும்மா ஜாலியாக பேசிக்கொண்டிருந்தோம். நாங்கள் ஜோக் செய்து கொண்டு இருந்தோம். ஆனால், அதை இப்படியெல்லாம் சொல்வார்கள் எனத் துளியும் நினைக்கவில்லை" என்றார்.

பிரான்ஸ் அதிபர் மக்ரோனின் (47) மனைவி பிரிஜிட் (72) ஆவார். கடந்த 2007ம் ஆண்டு ஒரு பள்ளியில் ஆசிரியராக பிரிஜிட் பணியாற்றிக் கொண்டு இருந்தபோதே மக்ரோன் அவரை சந்தித்தார். இருவருக்கும் இடையே கிட்டதட்ட 25 வயது வித்தியாசம் இருந்த போதும், அதையும் தாண்டி காதல் மலர்ந்தது. திருமணத்திற்குப் பிறகு மக்ரோனுக்கும் அரசியல் வாழ்க்கையில் ஏற்றம் ஏற்பட்டது குறிப்பிடத்தக்கது.

பின்னணி என்ன

அதேநேரம் பிரான்ஸ் அதிபர் குறித்து இதுபோன்ற தகவல்கள் பரவுவது இது முதல்முறை இல்லை. ஒரே மாதத்தில் மூன்றாவது முறையாக இதுபோன்ற தகவல்கள் பரபரப்பாகிறது. உக்ரைன் மோதலில் ரஷ்யாவைக் கண்டித்ததால் அவர்களே இதுபோன்ற பொய்யான தகவல்களைத் திட்டமிட்டுப் பரப்பி வருவதாக பிரான்ஸ் அதிபர் மாளிகை கூறுகிறது.

சமீபத்தில் தான் பிரிட்டிஷ் பிரதமர் கெய்ர் ஸ்டார்மர் மற்றும் ஜெர்மன் அதிபர் பிரீட்ரிக் மெர்ஸுடன் இணைந்து மாக்ரோன் உக்ரைன் சென்றிருந்த போது அவர் போதைப்பொருள் எடுத்துக் கொண்டதாகக் கூட இணையத்தில் தகவல்கள் பரப்பப்பட்டது குறிப்பிடத்தக்கது.

English summary

France President Macron calls it just joking after a video shows Brigitte shoving his face during a Vietnam tour (பிரான்ஸ் அதிபர் குறித்து இணையத்தில் பரவும் வீடியோ): Russia is trying to spread misinformation against France.