'நான் அவள் அல்ல': கடன்காரர்களுக்கு டிமிக்கி கொடுக்க ஆணாக மாறிய பெண்

By Siva

Updated: Monday, May 5, 2014, 17:22 [IST]

Subscribe to Oneindia Tamil

லண்டன்: கடன் தொல்லையில் இருந்து தப்பிக்க பெண் ஒருவர் ஆணாக மாறும் அறுவை சிகிச்சை செய்து கொண்ட வினோதம் ரஷ்யாவில் நடந்துள்ளது.

தென்கிழக்கு ரஷ்யாவைச் சேர்ந்தவர் நடாலியா(38). அவர் ரூ.2 லட்சத்து 26 ஆயிரத்து 530 கடன் வாங்கி வைத்துள்ளார். கடன் கொடுத்தவர்கள் பணத்தை திருப்பிக் கேட்டு நெருக்கடி கொடுத்துள்ளனர். ஆனால் அவரிடம் கடன் பாக்கியை கொடுக்க பணம் இல்லை. இதையடுத்து அவர் கடன் தொல்லையில் இருந்து தப்பிக்க என்ன செய்யலாம் என்று தீவிரமாக யோசித்தார்.

அப்போது தான் அறுவை சிகிச்சை செய்து ஆணாக மாறிவிட்டால் இந்த கடன் தொல்லையில் இருந்து தப்பித்துவிடலாம் என்று அவருக்கு தோன்றியது. இதையடுத்து அவர் அறுவை சிகிச்சை செய்து ஆணாக மாறிவிட்டார். ஆணாக மாறிய நடாலியாவின் தற்போதைய பெயர் ஆன்ட்ரியன். ஆன்ட்ரியன் என்ற பெயரில் அவர் புதிய பாஸ்போர்ட்டை பெற்று மேலும் பலரிடம் கடன் வேறு வாங்கியுள்ளார்.

கடனை திருப்பிக் கொடுக்காமல் தலைமறைவாக இருந்து வருகிறார் அவர். இந்நிலையில் நடாலியாவை தேடிச் சென்ற போலீசாருக்கு அப்படி ஒரு பெண்ணே இல்லை ஆன்ட்ரியன் என்பவர் தான் இருக்கிறார் என்பது தெரிய வந்து அதிர்ச்சி அடைந்தனர்.