நாளுக்கு நாள் நலிவடைந்து வரும் பேராசிரியர் அன்பழகன்.. தொடர் மருத்துவ கண்காணிப்பு
Recommended Video
சென்னை: திமுக பொதுச் செயலாளர் பேராசிரியர் அன்பழகன் உடல்நிலை நாளுக்கு நாள் நலிவடைந்து வருகிறதாம். அவர் தொடர் மருத்துவக் கண்காணிப்பில் இருந்து வருகிறார்.
திமுக பொதுச்செயலாளர் பேராசிரியர் அன்பழகனுக்கு வயது 97. உலகிலேயே இந்த வயதில் ஒரு கட்சியின் பொதுச்செயலாளராக யாரும் இருந்ததில்லை.
அரைநூற்றாண்டு காலத்திற்கும் மேலாக தமிழக அரசியலில் தடம் பதித்து வருபவர் இவர். தள்ளாத வயதிலும் தளர்வின்றி கடந்த சில மாதங்களுக்கு முன்பு வரை கட்சிப்பணி ஆற்றி வந்த பேராசியர் அன்பழகன் இன்று படுத்த படுக்கையாக சிகிச்சை பெற்று வருகிறார்.
அவரை மருத்துவர்கள் குழுவினர் தொடர் கண்காணிப்பில் வைத்துள்ளனர். அவரது மருமகனே மருத்துவர் என்பதால் அவர் தலைமையில் அன்பழகனுக்கு சிகிச்சை வழங்கப்பட்டு வருகிறது.
கீழ்பாக்கம் கார்டனில் உள்ள வீட்டில் அன்பழகன் இருக்கிறார். உணவு உண்ண முடியாததால் மூக்கின் வழியாக டியூப் போட்டு திரவ நிலையில் உணவு தரப்படுகிறதாம். கடந்த சில நாட்களாக அவ்வப்போது நினைவும் தப்பிவிடுகிறதாம்.
மேலும், பேசமுடியாத நிலையில் தன்னை பார்ப்பவர்களை அடையாளம் காணவே அவர் ரொம்ப சிரமப்படுகிறாராம். கம்பீர தோற்றத்தில் கழுத்தில் சால்வையுடன் வலம் வந்தவர், இன்று வயது மூப்பின் காரணமாக நோயுற்று அவதியுறுவதை கண்டு கவலையடைந்துள்ளனர் திமுகவில் உள்ள அவரது அனுதாபிகள்.