தமிழ்நாட்டுக்கு ஒரு பங்கம் என்றால்.. பிரதமரை தொடவும் தயங்கமாட்டோம்! அதிமுக இளைஞர் பாசறை பாய்ச்சல்!

அண்ணாமலைக்கு அதிமுக இளைஞர் பாசறை பதிலடி.

Updated: Thursday, March 9, 2023, 12:22 [IST]

Subscribe to Oneindia Tamil

காஞ்சிபுரம்: தமிழ்நாட்டு உரிமைகளுக்கு ஒரு பங்கம் என்றால் பிரதமரை தொட்டுப் பார்க்கவும் தயங்கமாட்டோம் என அக்கட்சியின் இளைஞர் மற்றும் இளம்பெண்கள் பாசறை மாநிலச் செயலாளர் பரமசிவம் பாய்ச்சல் காட்டியுள்ளார்.

ஒரே ஓட்டில் வாஜ்பாயை வீட்டுக்கு அனுப்பிய கட்சி அதிமுக என்பதை பாஜகவினர் மறந்துவிடக் கூடாது எனக் கூறியுள்ளார்.

அதிமுகவுக்கு என்று ஒரு நியூட்டனின் விதி இருப்பதாகவும் ஒன்றுக்கு மூன்றாக திருப்பிக் கொடுப்பது தான் அதிமுகவின் நியூட்டன் விதி எனவும் பரமசிவம் தெரிவித்தார்.

அதிமுக -பாஜக

'ஒன்றுக்கு ஒன்றாக முத்துக்கு முத்தாக' என்ற பாடல் வரிகளுக்கேற்ப அதிமுகவும், பாஜகவும் ஒற்றுமையாக இருந்த காலம் மலையேறி போய்விட்ட நிலையில், இன்று அடிதடி நடக்கும் அளவுக்கு இரண்டு கட்சிகளும் பிய்த்துக் கொண்டு நிற்கின்றன. பாஜக முக்கிய நிர்வாகிகள் வரிசையாக அதிமுகவில் இணைந்து வருவது குறித்து கூறிய அண்ணாமலை, ஒவ்வொரு வினைக்கும் ஒரு எதிர்வினை உண்டு என எச்சரிக்கை விடுத்திருந்தார்.

ஒன்றுக்கு 3ஆக திருப்பிக் கொடுப்போம்

இதனிடையே அவருக்கு பதிலடி கொடுக்கும் வகையில் பேசியுள்ள அதிமுக இளைஞர் மற்றும் இளம்பெண்கள் பாசறை மாநிலச் செயலாளர் பரமசிவம், அதிமுகவுக்கு என்று ஒரு நியூட்டனின் விதி இருப்பதாகவும் ஒன்றுக்கு மூன்றாக திருப்பிக் கொடுப்பது தான் அதிமுகவின் நியூட்டன் விதி எனவும் ஒரே ஓட்டில் வாஜ்பாயை வீட்டுக்கு அனுப்பிய கட்சி அதிமுக என்பதை பாஜகவினர் மறந்துவிடக் கூடாது எனவும் பாய்ந்துள்ளார்.

தடிமணாக பேசாதீர்

அண்ணாமலை வார்த்தைகளை தடிமணாக விடக்கூடாது என்றும் தமிழகத்தின் உரிமைகளுக்கு பிரச்சனை ஏற்படுமானால் பிரதமரை தொட்டுப் பார்க்கவும் தயங்காத கட்சி அதிமுக என்பது கடந்தகால வரலாறு எனவும் பேசினார். எடப்பாடி பழனிசாமியின் ஆளுமையை அறிந்து இளைய சமுதாயத்தினர் அதிமுகவில் இணைய ஆர்வம் காட்டி படையெடுத்து வருகிறார்கள் என்றும் பாஜகவினரை ஏதோ நாங்கள் வலை வீசி பிடித்து வந்ததை போல் பேசுவதை அண்ணாமலை நிறுத்திக்கொள்ள வேண்டும் எனவும் கூறியிருக்கிறார்.

வார்த்தைப் போர்

அதிமுக -பாஜக இடையேயான வார்த்தைப் போர் முற்றுவதை பார்த்தால் 2024 நாடாளுமன்றத் தேர்தல் கூட்டணியில் மிகப்பெரிய மாற்றங்கள் வரலாம் என எதிர்பார்க்கப்படுகிறது.