தடுப்பு சுவரை உடைத்துக்கொண்டு சாலையில் பாய்ந்த சரக்கு ரயில்.. ஜஸ்ட் மிஸ்.. வண்டியோடு போச்சு!

Updated: Tuesday, October 3, 2023, 20:15 [IST]

Subscribe to Oneindia Tamil

காஞ்சிபுரம்: காஞ்சிபுரத்தில் சரக்கு ரயில் தடம் புரண்டு விபத்துக்குள்ளானது. சரக்கு ரயில் தண்டவாளத்தில் இருந்து தடம் புரண்டு சாலையை நோக்கிச் சென்றதால் அப்பகுதியில் இருந்த வாகன ஓட்டிகள் அலறியடித்து ஓடினர்.

காஞ்சிபுரம் பழைய ரயில்வே நிலையத்தில் சரக்கு முணையம் செயல்பட்டு வருகிறது. இந்த சரக்கு முனையத்தில் பல்வேறு பகுதிகளில் இருந்து அவ்வப்போது வரும் சரக்கு ரயில்கள் வந்து நிற்கும். சரக்கு ரயில்களில் இருந்து சரக்குகள் லாரிகள் மூலம் இங்கிருந்து எடுத்துச் செல்லப்படும்.

இந்நிலையில் இன்று கர்நாடக மாநிலம் பெல்லாரியிலிருந்து இரும்பு தொழிற்சாலைக்கு காயில் ஏற்றி வந்த சரக்கு ரயில் காஞ்சிபுரம் பழைய ரயில் நிலையத்தில், கட்டுப்பாட்டை இழந்த சரக்கு ரயில், தடுப்புச் சுவரை உடைத்துக்கொண்டு தண்டவாளத்தில் இருந்து தடம் புரண்டு சாலை நோக்கிச் சென்றது. இதனால், அப்பகுதியில் இருந்தவர்கள் அலறியடித்து ஓடினர்.

எனினும், சரக்கு ரயில் பெட்டிகள் தடுப்புச் சுவரை உடைத்தன. தடுப்பு கட்டைகள் உடைந்து விழுந்ததில் அங்கு நின்றிருந்த இருசக்கர வாகனங்கள் ரயில் பெட்டி விழுந்ததில் நசுங்கி சேதமடைந்தன. அதில் வந்தவர்கள் குதித்து ஓடியதால் உயிர் தப்பினர்.

வாக்கி டாக்கி சிக்னல் கோளாறு காரணமாக, ரயில் ஓட்டுநர் ரயிலை நிறுத்த முயன்றபோது கட்டுப்பாட்டை இழந்ததாக கூறப்படுகிறது. ரயில்வே கேட் போடப்பட்டிருந்தால் பெரும் உயிர்ச்சேதம் தவிர்க்கப்பட்டுள்ளதாக தகவல் வெளியாகியுள்ளது. இந்த விபத்து குறித்து ரயில்வே போலீசார் விசாரணை மேற்கொண்டு வருகின்றனர்.

மேலும் காஞ்சிபுரம் போலீசார், பொதுமக்கள் யாரும் உள்ளே வராமல் இருக்க அப்பகுதிகளில் தடுப்புகளை அமைத்தும், போக்குவரத்தை மாற்றுப் பாதையில் திருப்பி விட்டும் பாதுகாப்பு பணியில் ஈடுபட்டு வருகின்றனர். இந்த விபத்தால் அப்பகுதியில் பெரும் பரபரப்பு ஏற்பட்டது.