"நடிகர் அஜித்துடன் இபிஎஸ்".. குமரி பிரசாரத்தில் தொண்டர் வழங்கிய பரிசு.. எடப்பாடி கொடுத்த ரியாக்சன்

சென்னை: தமிழக சட்டசபை தேர்தலையொட்டி அதிமுக பொதுச்செயலாளர் எடப்பாடி பழனிச்சாமி தீவிரமாக பிரசாரத்தை தொடங்கி உள்ளார். நேற்று அவர் கன்னியாகுமரி சட்டசபை தொகுதியில் பிரசாரம் மேற்கொண்டார். அப்போது நடிகர் அஜித் குமாரும், எடப்பாடி பழனிச்சாமியும் சேர்ந்து இருக்கும் போட்டோவை தொண்டர் ஒருவர் பரிசாக வழங்கினார். அதனை பார்த்தவுடன் எடப்பாடி பழனிச்சாமி சிரித்தபடி வாங்கி தனது வாகனத்திற்குள் வைத்து கொண்டார்.

தமிழக சட்டசபை தேர்தல் களம் சூடுபிடிக்க தொடங்கி உள்ளது. அரசியல் கட்சி தலைவர்கள் தீவிர பிரசாரத்தை தொடங்கி விட்டனர். குறிப்பாக எடப்பாடி பழனிச்சாமி அதிமுக வேட்பாளர்கள் மற்றும் கூட்டணி கட்சி வேட்பாளர்களை ஆதரித்து பிரசாரத்தை முன்னெடுத்து வருகிறார்.

அந்த வகையில் நேற்றைய தினம் எடப்பாடி பழனிச்சாமி கன்னியாகுமரி சட்டசபை தொகுதியில் பிரசாரம் மேற்கொண்டார். கன்னியாகுமரி தொகுதியில் தற்போது சிட்டிங் எம்எல்ஏவாக அதிமுகவின் தளவாய் சுந்தரம் உள்ளார். மீண்டும் அவரே கன்னியாகுமரி தொகுதியில் அதிமுக சார்பில் போட்டியிடுகிறார்.

இந்நிலையில் தான் நேற்றைய தினம் எடப்பாடி பழனிச்சாமி, தளவாய் சுந்தரத்துக்கு ஆதரவாக கன்னியாகுமரி சட்டசபை தொகுதிக்குட்பட்ட பகுதிகளில் பிரசாரம் மேற்கொண்டார். திறந்த வேனில் எடப்பாடி பழனிச்சாமி, தளவாய் சுந்தரம் ஆகியோர் நின்று பொதுமக்களிடம் வாக்கு சேகரித்தனர்.

இந்த சமயத்தில் அதிமுக தொண்டர் ஒருவர் எடப்பாடி பழனிச்சாமிக்கு போட்டோ பிரேம் ஒன்றை பரிசாக வழங்கினார். கூட்டத்தில் நின்ற அதிமுக தொண்டர், எடப்பாடி பழனிச்சாமியுடன், நடிகர் அஜித் இருப்பது போன்ற போட்டோவை பிரேமை எடுத்து நீட்டினார்.

திறந்த வேனில் மேல்புறம் நின்ற எடப்பாடி பழனிச்சாமி அதனை பார்த்ததும் சிரித்தபடி அந்த தொண்டரிடம் இருந்து போட்டோவை வாங்கினார். பிறகு போட்டோவை பார்த்து அவர் கேமராக்களுக்கு போஸ் கொடுத்தார். அதன்பிறகு அவர் அந்த போட்டோவை வேனுககுள் வழங்கினார்.

தமிழக சட்டசபை தேர்தலில் விஜய் தற்போது கட்சியை தொடங்கி உள்ளார். சினிமாவில் விஜய் இருந்தபோது அவரது ரசிகர்கள் நடிகர் அஜித் குமார் மற்றும் அவரது ரசிகர்களை கடுமையாக விமர்சனம் செய்து வந்தனர். இதனால் அஜித் குமாரின் ரசிகர்களின் ஓட்டுகள் யாருக்கு செல்லும்? என்ற கேள்வி உள்ளது.

அஜித் ரசிகர்களின் ஓட்டுகளை பெற ஒவ்வொரு கட்சியினரும் முயன்று வருகின்றனர். அந்த வகையில் நடிகர் அஜித் குமாருடன், எடப்பாடிபழனிச்சாமி இருக்கும் போட்டோவை அவருக்கு தொண்டர் ஒருவர் பரிசாக வழங்கி இருப்பது கவனம் பெற்றுள்ளது.

English summary

Edppadi Palaniswami With AJith Kumar: Ahead of the Tamil Nadu Assembly elections, AIADMK General Secretary Edappadi Palaniswami has launched an intensive campaign. Yesterday, he campaigned in the Kanyakumari Assembly constituency. During the event, a party cadre presented him with a photograph featuring both actor Ajith Kumar and Edappadi Palaniswami as a gift. Upon seeing it, Edappadi Palaniswami accepted the gift with a smile and placed it inside his vehicle.