இந்த பழைய ரூ500, ரூ1000 நோட்டுகளை மாற்றி தாங்க தம்பி.. கிராம சபையில் அமைச்சரையே அதிர வைத்த முதியவர்!

கன்னியாகுமரி: கிராம சபைக் கூட்டத்தில் பழைய 500, 1000 ரூபாய் நோட்டுகளை கொண்டு வந்த முதியவர், அமைச்சர் மனோ தங்கராஜிடம் கொடுத்து இந்த நோட்டுகளை மாற்றி தாருங்கள் தம்பி என கேட்டது அங்கிருந்தவர்கள் மத்தியில் அதிர்ச்சியை ஏற்படுத்தியது.

காந்தி ஜெயந்தியை முன்னிட்டு நேற்றைய தினம் தமிழகம் முழுவதும் கிராம சபை கூட்டம் நடந்தது. அந்த கூட்டத்தில் அமைச்சர்கள் கலந்து கொண்டு மக்களை குறைகளை கேட்டறிந்தனர். அந்த வகையில் கன்னியாகுமரி மாவட்டம் ஞாலம் ஊராட்சி பகுதியில் கிராம சபை கூட்டம் நடந்தது.

அதில் பால்வளத் துறை அமைச்சர் மனோ தங்கராஜ், மாவட்ட ஆட்சியர் ஸ்ரீதர் உள்ளிட்டோர் கலந்து கொண்டனர். இந்த கூட்டத்தில் அந்த பகுதியை சேர்ந்த 100-க்கும் மேற்பட்ட பொதுமக்கள் கலந்து கொண்டனர். அவர்கள் தங்கள் குறைகளை கூறினர்.

இதை கேட்ட அதிகாரிகளும் அமைச்சரும் பிரச்சினைகளை உடனடியாக சரி செய்து தருவதாக பொதுமக்களிடம் வாக்குறுதி அளித்தனர். இந்த நிலையில் திடீரென 70 வயது முதியவர் ஒருவர் அமைச்சர், அதிகாரிகளை நோக்கி வந்தார். அப்போது அவர் பழைய ரூ 500, 1000 நோட்டுகளை கையில் வைத்திருந்தனர்.

அருகே வந்த அந்த முதியவர், அமைச்சரிடம் அந்த நோட்டுக்களை கொடுத்து தம்பி இதை கொடுத்துவிட்டு புதிய நோட்டுகளை மாற்றி தர வேண்டும் என கோரிக்கை விடுத்தார். இதனால் அமைச்சர் மனோ தங்கராஜ் அதிர்ச்சி அடைந்தார். பின்னர் முதியவரிடம், நான் மாற்றி தருகிறேன், அதிகாரிகளிடம் சொல்கிறேன் என கூறிவிட்டு சென்றார்.

2016ஆம் ஆண்டு ரூ 500, 1000 செல்லாது என அறிவிக்கப்பட்டு அதற்கு பதிலாக ரூ 500, ரூ 2000 நோட்டுகள் அறிமுகப்படுத்தப்பட்டன. இந்த ரூ 2000 நோட்டுகளும் செல்லாது என்றே கடந்த மே மாதம் அறிவிக்கப்பட்டுள்ளது. இதற்கான கால கெடு செப்டம்பர் 30 என கொடுக்கப்பட்டிருந்த நிலையில் அக்டோபர் 7ஆம் தேதி வரை இந்த 2000 நோட்டுகளை ஒப்படைக்க கால அவகாசமாக வரும் அக்டோபர் 7-ஆம் தேதி வரை கொடுக்கப்பட்டுள்ளது.

ரூ 500, ரூ 1000 நோட்டுகள் மீது பணமதிப்பிழப்பு நடவடிக்கை எடுக்கப்பட்டு கடந்த 7 ஆண்டுகளாக அந்த நோட்டுகள் செல்லாது என்பதே அந்த முதியவருக்கு தெரியாமல் இருந்துள்ளது அது பற்றிய போதிய விழிப்புணர்வு இல்லாததே காரணமாகும். இந்த முதியவரை போல் நிறைய மூதாட்டிகளும் , முதியவர்களும் ரூ 500, ரூ 1000 நோட்டுகளை வைத்துக் கொண்டு மாற்ற முடியாமல் தவித்து வருகிறார்கள்

English summary

Elderman in Gram Sabha Meeting asked Minister Mano Thangaraj to change the demonetised notes of Rs 500 and Rs 1000.