விஏஓ கொலை பற்றி அவதூறு.. அதிமுக ஐடி விங் லீடர் கைது! போலீஸ் ஸ்டேஷனில் குவிந்த கட்சியினரால் பரபரப்பு!

கரூர் : திமுக அரசுக்கு எதிராக சமூக வலைதளங்களில் அவதூறு பரப்பியதாக கரூர் மாவட்ட அதிமுக தகவல் தொழில்நுட்ப பிரிவு துணைத் தலைவர் கைது செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியது.

தூத்துக்குடி மாவட்டம், முறப்பநாடு அருகே கோவில்பத்து கிராம நிர்வாக அலுவலர் லூர்து பிரான்சிஸ் கடந்த 25-ஆம் தேதி அவரது அலுவலகத்திலேயே வெட்டிப் படுகொலை செய்யப்பட்டார். ஆற்று மணல் கொள்ளையர்களுக்கு எதிராக காவல் நிலையத்தில் புகார் அளித்ததால் ஆத்திரமடைந்த மணல் கொள்ளையர்கள் அவரை வெட்டிக் கொன்றதாக விசாரணையில் தெரியவந்துள்ளது.

பணியில் இருந்த விஏஓ கொல்லப்பட்ட சம்பவத்திற்கு பலரும் கண்டனம் தெரிவித்தனர். எதிர்க்கட்சி தலைவரான எடப்பாடி பழனிசாமி திமுக அரசை கடுமையாக விமர்சித்தார். திமுக ஆட்சியில் சட்டம் ஒழுங்கு சீர்கெட்டுப் போயிருப்பதாக அதிமுக, பாஜக உள்ளிட்ட எதிர்க்கட்சிகள் கடுமையாக விமர்சித்துள்ளன.

இந்நிலையில், விஏஓ கொலை சம்பவம் தொடர்பாக சமூக வலைதளங்களில் கரூர் மாவட்ட அதிமுக தகவல் தொழில்நுட்ப பிரிவு மாவட்ட துணைத் தலைவரான நவலடி கார்த்திக் (35), தமிழ்நாடு அரசு, முதல்வர் ஸ்டாலின், மின்துறை அமைச்சர் செந்தில் பாலாஜி ஆகியோருக்கு எதிராக அவதூறு கருத்துகளை பரப்பியதாக கூறப்படுகிறது.

இதையடுத்து கரூர் நகர போலீசார் அதிமுக ஐடி விங் நிர்வாகி கார்த்திக்கை இன்று நேற்று கைது செய்து விசாரணை நடத்தினர். இதுகுறித்து தகவலறிந்த அதிமுகவினர் கரூர் நகர காவல் நிலையம் முன்பு திரண்டதால் பரபரப்பு ஏற்பட்டது. விசாரணைக்கு பிறகு போலீசார் கார்த்திக்கை நீதிமன்றத்தில் ஆஜர்படுத்தி சிறையில் அடைத்தனர்.

English summary

Karur District AIADMK IT Wing Vice President arrested for spreading defamation against the DMK government on VAO murder on social media created a lot of stir.