நான் சொன்னது போலவே அமமுக கூடாரம் கலகலக்கிறது.. அமைச்சர் எம்.ஆர். விஜயபாஸ்கர் மகிழ்ச்சி

கரூர்: தான் சொன்னது போல், அமமுக கூடாரம் காலியாகி வருவதாக போக்குவரத்து அமைச்சர் எம்.ஆர் விஜயபாஸ்கர் மகிழ்ச்சி தெரிவித்துள்ளார்.

அதிமுகவில் இருந்து பிரிந்து, டிடிவி தினகரனின் அமமுகவில் இருப்பவர்கள் மீண்டும் தாய் கழகத்துக்கு வரலாம் என்று முதலமைச்சர் எடப்பாடி பழனிசாமி உள்ளிட்டோர் தொடர்ந்து விடுத்து வந்த அழைப்புக்கு தற்போது கூடுதல் பலன் கிடைக்க தொடங்கியுள்ளது.

அதன் முக்கிய அம்சமாக, கரூரில் உள்ள அமமுகவினர், அக்கட்சியில் இருந்து பிரிந்து தற்போது அதிமுகவில் இணைந்து வருகின்றனர். பல நாட்களாக அங்கொன்றும், இங்கொன்றுமாக நடைபெற்று வந்த இணைப்பு நிகழ்ச்சிகள் தற்போது கனஜோராக நடக்க ஆரம்பித்துள்ளன.

அமமுகவில் இருந்து முன்னாள் அமைச்சர் செந்தில் பாலாஜி திமுகவில் ஐக்கியமாகிறார் என்ற செய்திகள் வலம் வரத் தொடங்கியவுடன், கரூரில் உள்ள அமமுகவினர், அக்கட்சியில் இருந்து விலகி, அதிமுகவுக்கு படையெடுக்க தொடங்கி உள்ளனர்.

அந்த வகையில் கரூரில் உள்ள அதிமுக மாவட்ட அலுவலகத்தில் போக்குவரத்து துறை அமைச்சர் எம்.ஆர்.விஜயபாஸ்கர் முன்னிலையில் 300க்கும் மேற்பட்ட அமமுகவின் தங்களை அதிமுகவில் இணைத்துக் கொண்டனர். வேறு கட்சிகளுக்கு செல்ல உடன்பாடில்லை என்பதால் தாய் கழகத்துக்கே திரும்பி வந்துவிட்டதாக அவர்கள் தெரிவித்தனர்.

இணைப்பு நிகழ்வு குறித்து செய்தியாளர்களிடம் பேசிய அமைச்சர் எம்ஆர் விஜய பாஸ்கர், அமமுக கூடாரம் காலியாகி வருகிறது என்றார். விரைவில் அந்த கட்சியில் உள்ள அனைவரும் தாய்க்கழகமாக அதிமுகவில் இணைவார்கள் என்றும் நம்பிக்கை தெரிவித்தார்.

English summary

In karur district so many AMMK party cadres are leaving the party and Transport Minister MR Vijayabhaskar has expressed his happiness over the development.